Morgunblaðið skýrir frá þessu. Fram kemur að þetta skili sér að vonum í auknum útgjöldum hjá Fæðingarorlofssjóði en áætluð aukning þeirra á milli síðasta árs og ársins í ár er allt að tveir milljarðar. Þarna kemur fjöldi fæðinga við sögu en einnig það að nýbakaðir foreldrar, sérstaklega feður, nýta réttindi sín betur en áður. Auk þess hafa greiðslur úr sjóðnum verið hækkaðar.
Morgunblaðið segir að útlit sé fyrir að þjóðin haldi áfram að fjölga sér ágætlega á þessu ári ef miðað er við upplýsingar frá Landspítala og Vinnumálastofnun sem hefur umsjón með Fæðingarorlofssjóði.
Í lok september á síðasta ári höfðu 3.720 börn fæðst á landinu og á tímabilinu júlí til og með september voru þær 1.310 og hafa ekki verið jafnmargar frá því byrjað var að skrá ársfjórðungstölur fyrir um áratug.
Endanlegar tölur um fjölda fæddra barna á síðustu þremur mánuðum ársins liggja ekki fyrir en ef miðað er við svipaða tíðni og fyrstu níu mánuðina þá er heildarfjöldinn yfir árið um 5.000.