Þann 13. október verður fyrirtaka við Héraðsdóm Reykjaness í máli konu sem ákærð er fyrir kynferðisbrot. Nánar tiltekið er konan sökuð um að hafa deilt mynd af getnaðarlimi þáverandi eiginmanns síns og tveimur nektarmyndum af konu til þriðja aðila. Þetta hafi hún gert án samþykkis eiginmannsins og umræddrar konu.
Segir í ákæru héraðssaksóknara í málinu, sem DV hefur undir höndum, að þessi háttsemi hafi verið til þess fallin að særa blygðunarsemi fólksins. Er konan sögð hafa gerst brotleg við 1. málsgrein 199. greinar a almennra hegningarlaga, en hún hljóðar svo:
„Hver sem útbýr, aflar sér eða öðrum, dreifir eða birtir myndefni, texta eða sambærilegt efni, þ.m.t. falsað efni, af nekt eða kynferðislegri háttsemi annars manns án hans samþykkis skal sæta sektum eða fangelsi allt að 4 árum.“
Héraðssaksóknari krefst þess að konan verði dæmd til refsingar og greiðslu alls sakarkostnaðar.
Fyrrverandi eiginmaður konunnar gerir kröfu um tvær milljónir króna í miskabætur. Konan sem sú ákærða dreifði nektarmyndum af fer fram á eina milljón króna.
Atvikin áttu sér stað í ágústmánuði árið 2020 en ákæra var gefin út í málinu þann 1. september síðastliðinn.
