Poul Funder Larsen, fréttamaður Jótlandspóstsins, reyndi að varpa ljósi á það í stuttu yfirliti. Hann sagðist telja að almennt séð sé staðan betri í dag en fyrir 14 dögum, að minnsta kosti hvað varðar vonir um að það dragi úr átökum í Úkraínu. Hann sagðist telja að í þetta sinn sé ástæða til að trúa orðum rússneska varavarnarmálaráðherrans um að Rússar ætli að draga „mjög“ úr hernaði sínum í Kyiv og Tjernehiv.
Larsen sagði að segja megi að þetta sé rökrétt sé litið á hvernig stríðið hefur þróast. Margir hafi bent á að Rússar hafi ekki næga hernaðarlega getu til að ráðast á Kyiv og því séu þeir að reyna að láta þetta líta vel út en geti í raun og veru ekki annað. Ekki liggi þó fyrir hvort þeir verði áfram með herlið nærri borginni. Hann benti á að um leið og Rússar flytja herlið frá Kyiv þá geti Úkraínumenn flutt herdeildir til Donbas og það sé eitthvað sem Rússar geti ekki viljað að þeir geri.
Hann sagði að ef áætlun A hjá Rússum hafi verið að ná Kyiv fljótt á sitt vald þá virðist sem áætlun B gangi út á að einbeita sér að Donbas þannig að héraðið verði á valdi Rússa þann 9. maí en þann dag lauk síðari heimsstyrjöldinni og er þessi dagur mjög þýðingarmikill fyrir Rússa.
Hvað varðar friðarsamning sagðist hann telja að langt væri í land með að hægt yrði að gera stóran pólitískan samning um málefni Úkraínu, raunhæfara sé að samið verði um vopnahlé og síðan áætlun um hvernig verði leyst úr málinu pólitískt séð.
