Það má eiginlega segja að myndbandið, sem er hér neðst í greininni, líkist einna helst einhverju úr tölvuleiknum Call of Duty. Í myndbandinu sést þegar úkraínskar varnarsveitir sátu fyrir rússneskum skriðdreka og grönduðu honum.

Það voru liðsmenn Azov herdeildarinnar, sem sér um varnir Maríupól, sem sátu fyrir skriðdrekanum og tóku myndbandið upp. Á upptökunni sést að þeir skjóta á tvö rússnesk farartæki. Annað þeirra er BTR–82A sem er brynvarið liðsflutningatæki og hitt er T–72B3 skriðdreki.

Myndbandið er tekið frá sjónarhorni skyttu á BTR-4 ökutæki úkraínska hersins en það er brynvarið ökutæki með 30 mm byssu.  Henni er fjarstýrt.

Árásin var að sögn gerð þann 11. mars síðastliðinn í Kreminna í Luhansk.