Meðal þeirra kosta sem Rauði krossinn er að skoða til að hýsa flóttafólk frá Úkraínu er Hótel Saga. Þetta segir Gylfi Þór Þorsteinsson, aðgerðarstjóri fyrir móttöku flóttafólks frá Úkraínu.

Morgunblaðið skýrir frá þessu í dag. Haft er eftir Gylfa að búið sé að útvega nokkur hús á Bifröst undir úkraínskt flóttafólk og einnig íbúðir á höfuðborgarsvæðinu. Einnig hefur tekist að útvega nokkra sumarbústaði í Ölfusborgum.

Haft er eftir Gylfa að allt sé þetta á réttri leið. Hann sagði að flóttafólkið dvelji alltaf fyrst í húsnæði á vegum Útlendingastofnunar en allt kapp sé lagt á að koma því í varanlegt húsnæði sem fyrst.