Lögfræðingurinn og stórmeistarinn Helgi Áss Grétarsson er vígreifur eftir úrslit helgarinnar í prófkjöri Sjálfstæðisflokksins í Reykjavík. Þar náði Helgi Áss frábærum árangri, sjöunda sæti af 26 frambjóðendum, og ljóst er að góðar líkur eru á því að hann standi uppi sem borgarfulltrúi í vor.

Helgi Áss hefur vakið talsverða athygli undanfarið ár fyrir greinar þar sem hann storkar viðhorfum þeirra sem hæst láta á samfélagsmiðlum og eru stundum sagðir vera pólitískt rétthugsandi. Í aðsendri grein sem birtist á Vísi í morgun túlkar Helgi Áss árangurinn sinn á þá leið að hinn þögli meirihluti hafi þarna sýnt vald sitt og hafnað eineltistilburðum.

„Í prófkjörsbaráttunni fann ég fyrir miklum velvilja í minn garð. Ófáir lýstu samstöðu með þeim skoðunum sem ég hef sett fram um dómstól götunnar. Eineltistilburðir net- og tístverja í málum þeim tengdum hræðir á hinn bóginn ófáa að tjá sig með þeim hætti sem ég hef gert. Jafnvel þótt margir séu sammála mér,“ skrifar Helgi Áss.

Gísli Marteinn þjónar einhverjum tilgangi

Hann segist svo hafa tekið eftir því að sjónvarpsmaðurinn Gísli Marteinn Baldursson hafi vakið athygli á færslu þar sem einn netverji furðar sig á því hversu margir hafi kosið Helga Áss. Umræddur netverji deilir svo hlekk á eina frægustu grein lögfræðingsins þar sem hann tekur upp hanskann fyrir tónlistarmanninn Ingó Veðurguð.

„Sú vísis-grein laut í grunninn að mikilvægi þess að réttlát málsmeðferð sé viðhöfð þegar ásakanir eru settar fram um refsiverða eða siðferðislega vafasama hegðun nafngreindra einstaklinga. Sá boðskapur er sígildur og fellur vel að þeirri stjórnmálastefnu að taumhald verður að vera á valdbeitingu gagnvart þeim einstaklingum sem sökum eru bornir. Hornsteinar siðaðs samfélags byggja á þessu grundvallaratriði. Jákvætt er að árangur minn í prófkjöri Sjálfstæðisflokksins sl. helgi hafi endurvakið athyglina á þessum boðskap. Sem dæmi hefur áðurnefnd grein mín frá júlí 2021 verið mest lesna greinin á visir.is síðan sunnudaginn 20. mars 2022. Tíst pólitískt rétthugsandi „smáfugla“þjónar þá einhverjum tilgangi, eftir allt saman,“ skrifar Helgi Áss.