Það er auðvitað ekki hægt að lýsa þeim hörmungum sem Úkraínubúar ganga í gegnum þessa dagana á fullnægjandi hátt. Innrás Rússa í landið hefur snúið tilveru margra algjörlega á hvolf enda stríð ekkert nema hryllingur. Milljónir hafa flúið heimili sín og mörg hundruð almennir borgarar hafa látist. Meðal þeirra er hin 10 ára Anastasia Stoluk, kölluð Nastya, sem var skotin til bana af drukknum rússneskum hermönnum í þorpi nærri Kyiv.

Mirror segir að rússneskir hermenn hafi byrjað að „skjóta í allar áttir“ í kjölfar þess að úkraínskur piltur skaut upp loftið úr byssu. Þeir urðu Nastya að bana. Þeir vildu ekki leyfa móður hennar, Luba, að jarðsetja hana í kirkjugarði svo hún var grafin í garðinum við heimili sitt að sögn frænku hennar, Anya Stoluk.

The Times hefur eftir Vera Dmitrienko, stjúpmóður Nastya, að sögur hermi að hermönnunum hafi leiðst mikið: „Þeir stálu úr öllum verslununum og náðu sér auðvitað í mikið af áfengi . . . og urðu drukknir og byrjuðu að skjóta. Þeir skutu inn í hús Nastya, hún var þar með frænda sínum og hún lést samstundis. Frændi hennar var fluttur á sjúkrahús en við höfum ekki fengið neinar upplýsingar um hann.“

Hún sagði að rússnesku hermennirnir hafi byrjað að skjóta eftir að úkraínskur unglingspiltur fann byssu og skaut upp í loftið: „Hermennirnir heyrðu þetta en af því að þeir voru svo drukknir vissu þeir ekki hvaðan skothvellurinn barst svo þeir byrjuðu bara að skjóta á allt sem þeir sáu. Þeir skutu á fjögur hús og í einu þeirra var Nastya.“

Mörg börn hafa beðið bana í stríðinu og fjöldi særst, þar á meðal litla stúlkan sem sést á myndinni hér fyrir neðan.