Volodimír Zelenskí, forseti Úkraínu, ávarpi þjóð sína í morgun og sagði að Úkraína hafi sýnt og sannað að þau séu engin lömb til að leika sér við heldur baráttufólk. Biðlaði hann til Evrópusambandsins að veita Úkraínu aðild eins fljótt og mögulegt sé og eins biðlaði hann til rússneskra hermanna að leggja niður vopn og yfirgefa Úkraínu.
Zelenskí sagði að lengi hafi verið talað niður til Úkraínumanna og kannski þess vegna hafi þeir ekki áttað sig á hvers þeir eru megnugir.
„Og nú höfum við sýnt hvað í okkur býr. Og það veitir innblástur. Fyrir alla. Í öllum samtölum við bandamenn okkar heyri ég einlæga virðingu. Úkraína hefur sýnt heiminum hver við erum. Og Rússland hefur sýnt hvað það er orðið.“
Hann velti því fyrir sér hvort að rússneskir hermenn viti á annað borð hvað þeir séu að gera núna í Úkraínu. Nú þegar hafi á fimmta þúsund rússneskra hermanna fallið í valinn. Því biðlar hann til þeirra:
„Hendið frá ykkur vopnunum og farið. Ekki hlusta á yfirmenn ykkar. Ekki hlusta á áróðurinn. Bjargið lífum ykkar. Farið.“
Hann biðlaði svo til Evrópusambandsins að veita Úkraínu aðild og eins skilaði hann innilegum þökkum til þeirra fjölda ríkja sem hafa veitt Úkraínu aðstoð undanfarna daga.
Hann tilkynnti einnig að sú þungbæra ákvörðun hafi verið tekin að hleypa þeim föngum sem hafa reynslu af átökum úr fangelsum og leyfa þeim að afplána dóma sína í herþjónustu. Að lokum sagði hann:
„Þegar ég bauð mig fram til forseta sagði ég að hvert og eitt einasta okkar væri forsetinn. Því við berum öll ábyrgð á ríki okkar. Á okkar fallegu Úkraínu. Og nú kemur á daginn að hvert og eitt einasta okkar er stríðsmaður á einn eða annan hátt. Og ég hef fulla trú á því að hvert og eitt einasta okkar muni sigra.“
