Þann 11. mars næstkomandi verður málflutningur fyrir Héraðsdómi Reykjavíkur í meiðyrðamáli þar sem Huginn Þór Grétarsson, útgefandi og barnabókahöfundur, stefnir barnsmóður sinni fyrir meiðyrði.
Huginn og barnsmóðir hans hafa lengi átt í forræðisdeilu. Allmargir netverjar hafa farið hörðum orðum um Hugin undanfarin ár og hefur hann stefnt fólki fyrir ýmis ummæli á Facebook og oftar en ekki haft betur. Í meiðyrðamálum er oft tekist á um það hvort ummæli sem stefnt er fyrir séu gildisdómar og falli þar með innan marka tjáningarfrelsis, eða hvort í þeim felist ásökun um ólöglegt athæfi.
Að þessu sinni er stefnt fyrir ummæli sem ná, þau elstu, fimm ár aftur í tímann. Krefst Huginn þess að samtals 14 ummæli konunnar um sig verði dæmd dauð og ómerk. Er annars vera um að ræða ummæli sem höfð voru eftir konunni í viðtali við Stundina og hins vegar ummæli hennar á samfélagsmiðlum. Meðal ummælanna eru eftirfarandi, skv. stefnu sem lögmaður Hugins hefur útbúið og lagt fram:
„Skömmu eftir komu mæðgnanna til landsins sá móðirin sig tilneydda að flytja ásamt barninu í Kvennaathvarfið eftir að barnsfaðir hennar hótaði að taka af henni barnið og vegabréf þess“
„Eftir komuna til Íslands hafði hún upplifað viðvarandi ofríki og ógn um ofbeldi af hálfu mannsins, sem reyndi meðal annars að þröngva henni til að flytja inn á heimili sitt.“
„Hversu mikið getur maður logið?! Hann virðist ekki þekkja nein takmörk.“
„Ó já, rétt er það herra misnotari.“
Í stefnunni segir að barnsmóðirin hafi einsett sér að vinna forsjármál gegn Hugin með því að bera á hann falskar sakir um andlegt, líkamlegt og kynferðislegt ofbeldi en engar slíkar ásakanir hafi komið fram áður en sú deila hófst. Segir að hún hafi með aðstoð Kvennaathvarfsins, fjölmiðla og samfélagsmiðla hafið rógsherferð gegn honum. Hafi meint ófrægingarherferð haft afar slæm áhrif á mannorð hans og er þess getið í því samhengi að Huginn sé barnabókahöfundur.
Auk ómerkingar ummæla gerir Huginn háar miskabótakröfur. Krefst hann þess annars vegar að konan greiði honum 5 milljónir í miskabætur ásamt dráttarvöxtum að liðnum mánuði frá birtingu stefnunnar og til greiðsludags. Hins vegar krefst hann þess að hún greiði honum 820 þúsund krónur ásamt dráttarvöxtum frá dómsuppsögudegi til greiðsludags. Ennfremur krefst hann málskostnaðar.
