Eins og við var að búast setti óveðrið strik í reikninginn hjá fjölmörgum Íslendingum, meðal annars hjá þeim sem voru á leið yfir Hellisheiðina síðdegis í gær. Löng bílalengja myndaðist þegar óveðrið var að skella á og haggaðist svo ekki. Að lokum þurfti að ferja ökumenn og farþega frá bílunum sínum.
Jón Bergs hjá ferðaþjónustunni Activity Iceland er einn af þeim sem hjálpaði við að ferja fólkið frá bílunum. Jón og fleiri frá Activity Iceland fóru á 5 bílum til að aðstoða við að flytja fólkið í Hellisheiðarvirkjun. „Þarna vorum við að aðstoða eins og oft áður. Allir bílar verða losaðir þegar veður leyfir,“ segir Jón í samtali við DV um málið.
Í myndbandi sem Jón tók upp á miðnætti í gær má sjá að eins konar dómsdagsstemning myndaðist á vegbútinum hjá Litlu kaffistofunni. Á veginum er fjöldinn allur af bílum sem þaktir eru snjó, minnir sjónin einna helst á fræga senu úr Walking Dead þáttunum vinsælu þar sem bílarnir sitja allir kyrrir á hraðbrautinni.
Myndbandið má sjá hér fyrir neðan:
