Fimmtudaginn 24. febrúar verður þingfest sakamál fyrir Héraðsdómi Vesturlands í Borgarnesi vegna afar óhugnanlegrar líkamsárásar sem framin var þann 17. október árið 2020.
Héraðssaksóknari gaf út ákæru í málinu þann 3. febrúar síðastliðinn og hefur DV ákæruna undir höndum. Í þeirri útgáfu hafa nöfn á stöðum og fólki verið hreinsuð út. Ekki er vitað hvort árásin átti sér stað í Borgarnesi eða í öðrum bæ á Vesturlandi.
Maður er þar sakaður um sérstaklega hættulega líkamsárás sem á að hafa átt sér stað laugardagskvöldið 17. október árið 2020. Árásin hófst á heimili árásarmannsins sem sakaður er um að hafa ráðist að öðrum manni, slegið hann ítrekað hnefahöggum í andlitið, stungið hann ítrekað með skærum í líkamann og einu sinni í andlitið.
Þolandinn er sagður hafa flúið af heimili árásarmansins sem elti hann og gerði tilraun til að stinga hann á öðrum stað sem ekki er tilgreindur í ákærunni.
Þolandinn hlaut fjögur sár vinstra megin á baki og á vinstri öxl, sár á vinstri olnboga og sár og mar á vinstri upphandlegg og sár á vinstri kinn.
Héraðssaksóknari krefst þess að árásarmaðurinn verði dæmdur til refsingar og greiðslu alls sakarkostnaðar. Búast má við að réttað verði í málinu í marsmánuði.
