Um næstu mánaðamót verður hætt að bólusetja gegn kórónuveirunni í Laugardalshöll. Mun fólk geta fengið bólusetningu á heilsugæslustöðvum eftir það. Mjög hefur dregið úr mætingu í bólusetningu síðustu vikur og því er ekki þörf fyrir að nota Laugardalshöll áfram.

Morgunblaðið skýrir frá þessu í dag. Haft er eftir Ragnheiði Ósk Erlendsdóttur, framkvæmdastjóra hjúkrunar hjá Heilsugæslunni á höfuðborgarsvæðinu, að nú mæti 100 til 150 manns í bólusetningu á dag og hafi mætingin dregist saman síðustu vikur.

Um þrjú þúsund PCR-sýni voru tekin á Suðurlandsbraut í gær og sagði Ragnheiður það vera svipaðan fjölda og síðustu daga.

48 sjúklingar lágu á Landspítalanum í gær með COVID-19. Þrír þeirra voru á gjörgæslu en enginn í öndunarvél. Meðalaldur sjúklinganna er 64 ár.