Talið er að hér á landi séu rúmlega 60 milljarðar króna þvættaðir árlega eða 2,3% af vergri landsframleiðslu. Hlutfall peningaþvættis af stærð hagkerfisins er svipað og hjá mörgum öðrum þjóðum.

Fréttablaðið skýrir frá þessu í dag. Fram kemur að þessar tölur byggi á nýrri greiningu breska öryggisfyrirtækisins Credas sem hafi unnið hana út frá gögnum frá OECD.

Fréttablaðið segir að í Belgíu, Ísrael og Bretlandi virðist umfang peningaþvættis vera hærra en hér á landi eða 4 til 6% en þessi lönd virðast vera helstu miðstöðvar peningaþvættis.

Í áhættumati Ríkislögreglustjóra frá því á síðasta ári kemur fram að mikil áhætta var talin stafa af skattsvikum sem frumbrotum peningaþvættis, reiðufjárviðskiptum innanlands og flutningi á reiðufé til og frá landinu, einkahlutafélögum, söfnunarkössum og happdrættisvélum. Veruleg áhætta var talin stafa af ýmsum öðrum þáttum og má þar nefna gjaldeyrisskiptum, starfsemi lögmanna, endurskoðenda, fasteignasala og bifreiðasala.

128 peningaþvættisbrot voru skráð hjá lögreglunni 2020. Flest tengdust þau fíkniefnabrotum, þjófnaði og fjárdrætti. Fimm tengdust skjalabrotum.

Fíkniefnabrot hafa verið talin meðal mest áberandi frumbrota peningaþvættis en Íslendingar eyða um 6 milljörðum króna í fíkniefni árlega samkvæmt tölum frá tölfræðistofnun ESB. Þetta er tæpla 10% af þeirri upphæð sem er þvættuð hér á landi.