Karlmaður á áttræðisaldri lést af völdum COVID-19 á hjúkrunarheimilinu Sunnuhlíð í Kópavogi í kjölfar hópsmits sem þar kom upp. Frá þessu greinir Viljinn sem vísar til þess að Þórólfur Guðnason, sóttvarnalæknir, hafi staðfest andlátið sem og Kristján Sigurðsson, framkvæmdastjóri Sunnuhlíðar.
Tugir íbúa og starfsmanna hjúkrunarheimilisins hafa greinst smitaðir undanfarið, þó án alvarlegra veikinda nema í þessu eina tilviki.
„Það er enn mikið um smit en sáralítið um veikindi. Erum þó að vonast til að geta opnað eina deild fyrir takmarkaðar heimsóknir í lok þessarar viku eða um næstu helgi, fer allt eftir því hvernig málin þróast,“ hefur Viljinn eftir Kristjáni. Hann segir þó að starfsemin verði áfram þung í þessari viku.
Um er að ræða 46 andlátið vegna COVID hér á landi síðan veiran nam hér land.
