Andrés Magnússon, framkvæmdastjóri Samtaka verslunar og þjónustu (SVÞ), og Jóhannes Þór Skúlason, framkvæmdastjóri Samtaka ferðaþjónustunnar (SF) vilja að bólusetningarskírteini verði tekin upp til að hægt sé að rýma takmarkanir vegna heimsfaraldursins.

Fréttablaðið skýrir frá þessu í dag og hefur eftir Andrési að þessi leið sé ekki óumdeild en sé notuð víða í nágrannalöndunum. „Það eru mótmæli upp á hvern einasta dag í Frakklandi. Stjórnvöld þar meta það þó svo, út frá heildarhagsmunum samfélagsins, að réttlætanlegt sé að mismuna við þessar kringumstæður til að halda samfélaginu gangandi,“ er haft eftir Andrési.

Jóhannes sagði eðlilegt að skoða þennan möguleika eins og aðra, þessi leið sé notuð í mörgum nágrannaríkjum okkar. Hann vildi ekki spá fyrir um hvort stjórnvöld taki upp bólusetningarskírteini en benti á að með upptöku þeirra myndist hvati til að fólk láti bólusetja sig. Óbólusettir valdi mestum þrýstingi á Landspítalann í dag.