Myndband af Birgittu Líf Björnsdóttur, markaðs- og samfélagsmiðlastjóra World Class og eiganda Bankastræti Club, að dansa við lagið Hverfinu eftir Gísla Pálma hefur vakið töluverða athygli á samfélagsmiðlum undanfarna daga. Ástæðan fyrir þessari athygli er sú að í myndbandinu togar Birgitta augun sín svo þau líkist augum fólks af asískum uppruna þegar Gísli fer með línuna „Augun pírð eins og Japanar“.
Birgitta hefur verið harðlega gagnrýnd fyrir þetta á samfélagsmiðlinum Twitter eftir að myndbandið var birt þar.
Ha ha ha ógeðslega fyndið 🙂 svo mikil “fyrirmynd” pic.twitter.com/og1VPNxIxm
— Kata (@kataakrazy) January 15, 2022
Miklar umræður sköpuðust í athugasemdunum við ofangreinda færslu á Twitter. „Þetta er ekki fyndið og mun aldrei vera fyndið,“ segir til að mynda einn netverji.
Þá bendir annar netverji á að mikill fjöldi starfsfólks World Class er af asískum uppruna.
„Við vitum öll að World Class sem business væri hvorki fugl né fiskur ef ekki væri fyrir framlag starfsfólksins af asískum uppruna sem halda pleisinu uppi í alla staði – og það á launum eflaust fjarri hennar príma whiteprivilege type shit,“ segir sá netverji.
Myndbandið vakti einnig mikla athygli á samfélagsmiðlinum Twitter. „Klassískur rasismi hjá Birgittu Líf,“ er yfirskriftin á myndbandi sem TikTok aðgangurinn @hlemmavideo birti. Það myndband hefur fengið rúmlega 35 þúsund áhorf og eru umræðurnar undir því ansi líflegar.
Til að mynda er mikið rætt um hvort þetta sé rasískt hjá Birgittu eða ekki. „Er fólk án djóks að pirra sig yfir þessu? Fáðu þér líf og hugsaðu frekar út í þig en aðra,“ segir til að mynda í einni athugasemdinni á TikTok og taka margir þar í svipaða strengi.
Þá benda margir á að þetta sé rasískt, hvort sem þeim finnist það eða ekki. „Þetta er rasismi og ef þú ert ekki asískur þá er það ekki þitt að ákveða hvort þetta sé ekki óviðeigandi,“ segir til dæmis í annarri athugasemd.
Birgitta skrifaði sjálf athugasemd við myndbandið sem birt var á TikTok en þar segir hún þetta hafa verið gert í hugsunarleysi. „Mér þykir ótrúlega leiðinlegt hvernig ég túlkaði þennan texta sem ég var að dansa og syngja við en það átti ekki að vera meint sem neitt grín,“ segir hún.
„Það var engin dýpri merking á bakvið þetta og ég biðst afsökunar á að hafa sært með hugsunarleysi mínu. Ég lifi og læri. Ást til allra.“
