Internetið: Uppspretta endalaus fróðleiks, og góðra díla. Sá síðasti í síðarnefnda flokknum: Hrúga af stígvélum í fiskikari á Facebook síðunni Brask og Brall.

Auglýsingin, sem birtist í gærkvöldi, vakti strax töluverða athygli. „Til sölu þetta kar með tugum vandaðra nýrra [stígvéla] frá 36 upp í 50 að ég held. Verð 60.000. […],“ segir í auglýsingunni og er neðangreind mynd birt með.

Fyrir þá sem vilja kýla á þessi kostakaup, má sjá auglýsinguna hér.

Úr umræðum sem sköpuðust undir auglýsingunni á Facebook má þó ráða að stígvélin eru alls ekki ný, heldur ónotuð, en misjafn skilningur virðist vera lagður í hugtakið „nýtt,“ og olli þessi misskilningur talsverðu fjaðrafoki seint í gærkvöldi.

„Hvaða djöfulsins rugl er þetta!! Þetat er hvorki nýtt né vandað!“ skrifaði einn og virtist talsvert niðri fyrir. „Reyndar aldrei verið notuð og þetta merki kostar skildinginn kæri spekingur,“ svarar seljandinn þá, staðfastur. „Ok. Grútskítugt, illa farið og óparað, sbr. þessa mynd. Og þú segir að þetta séu NÝ stígvél. Eitthvað gruggugt við þetta!!“ bætir efasemdarmaðurinn þá við.

Annar sem hellti sér í umræðurnar í gærkvöldi benti góðlátlega á að betra mætti standa að söluaðferðum: „Það er algert lágmark þegar selja á hluti, að vanda til verka. M.a. að þrífa vöruna og stilla upp svo að vel sé. Hvort sem þetta er góð vara eða ekki, nýtt eða gamalt, þá segir myndin mér bara að þetta sér drasl.“

Þá virðist það vera svo að þar sem aðrir sjá drasl, sjá stórfættir tækifæri til að skóa sig upp fyrir komandi hlákutíð, enda segist seljandinn vera með skóstærðir upp í 50.