Samkvæmt nýjum tölum frá bandarísku alríkislögreglunni FBI þá fjölgaði morðum töluvert í Bandaríkjunum á síðasta ári miðað við árið á undan. Nam aukningin 29% á milli ára. Svo mikið hefur morðum ekki fjölgað á milli ára í Bandaríkjunum í um 60 ár.
Í heildina voru um 21.500 myrtir á síðasta ári eða um 4.900 fleiri en 2019. Washington Post segir að sóttvarnaaðgerðir geti hafa átt þátt í aukningu morða. Afbrotafræðingar og lögreglumenn segja einnig að félagslegar og efnahagslegar aðstæður hafi skipt máli. Einnig kemur aukin sala á skotvopnum við sögu.
Þetta er þó ekki eina skýringin að mati Harold Medina, lögreglustjóri í Albuquerque í Nýju Mexíkó en þar sló fjöldi morða öll met á síðasta ári. Hann segir að auk heimsfaraldurs kórónuveirunnar þá spili eftirköst óeirða vegna kynþáttamála inn í og breytingar á reglum um reynslulausn sakamanna.
Þess utan er það blanda fíkniefna, peninga og vopna sem kemur við sögu eins og hún hefur gert áratugum saman, sérstaklega hvað varðar morð á ungum karlmönnum.
„Margt bendir til að fólk sé undir álagi vegna fátæktar og andlegrar vanlíðunar auk þess að vera háð fíkniefnum og að það leysi mörg deilumál með vopnum,“ hefur New York Times eftir Liz Thompson, sem stýrir morðdeild lögreglunnar í Albuquerque.
Tölurnar frá FBI eru greindar niður í hvernig morðin eru framin og sýna þær að tveir þriðju hlutar morðanna voru framin með skotvopnum.
New York Times segir að þróunin á þessu ári sé sú sama og á síðasta, morðum fari fjölgandi en þó hafi aðeins hægt á þróuninni síðustu vikur.