Svo gæti farið að karlmenn yrðu í meirihluta á
Eins og greint var frá fyrr í dag þá stendur til að endurtelja öll atkvæði í Norðvesturkjördæmi. Ástæða þess að ákvörðun er tekin um endurtalningu er lítill munur á atkvæðamagni sem gæti þýtt tilfærslu á jöfnunarþingsætum, og þá jafnvel víðar en í þessu kjördæmi. Sama staða var uppi á teningnum í Suðurkjördæmi en þar var ákveðið að endurtelja ekki atkvæðin.
Jóhann Óli Eiðsson, blaðamaður á Viðskiptablaðinu og áhugamaður um kosningar, fer yfir stöðu mála á Twitter-síðu sinni. Þar kemur fram að Viðreisn vanti aðeins tvö atkvæði til þess að staða jöfnunarþingmanna fari í fullkomið uppnám.
Þannig myndu þingmenn eins og Lenya Rún Taha Karim (P), Hólmfríður Árnadóttir (VG), Rósa Björk Brynjólfsdóttir (S), Guðmundur Gunnarsson (C) og Karl Gauti Hjaltason (M) detta útaf þingi ef þessi tveggja atkvæða sveifla raungerist.
Inn myndu koma í stað þeirra Bergþór Ólason (M), Gísli Rafnar Ólason (P), Orri Páll Jóhannesson (VG), Jóhann Páll Jóhannsson (S) og Guðbrandur Einarsson (C).
Tíðindin myndu einnig þýða að Lenya Rún yrði ekki yngsti þingmaður sögunnar eins og greint hefur verið frá auk þess sem að karlar yrðu þá með nauman meirihluta á konur innan veggja Alþingis.
Friðjón Friðjónsson, almannatengill og verðandi varaþingmaður, segir að um fullkomið PR-klúður yrði að ræða þar sem að erlendir fjölmiðlar hafa farið mikinn í að fjalla um að þá staðreynd að Ísland sé fyrst Evrópulanda til þess að veita konum meirihluta á þjóðþingi sínu.
Stuttur þráður:
Ástæðan fyrir endurtalningu er Viðreisn. Þau fá jöfnunarmann nr. 2 en það munar TVEIMUR atkvæðum á því hvort þau taki hann í Norðvestur eða Suðurkjördæmi. Ef hann færist úr NV í SU þá hefur það áhrif á alla halarófuna niður.
— Jóhann Óli Eiðsson (@jedissson) September 26, 2021