Eftir endurtalningu atkvæða í Norðvesturkjördæmi sem lauk nú síðdegis kom í ljós að atkvæði Viðreisnar höfðu verið oftalin um 9 og atkvæði Miðflokksins um 5. Þetta þýðir miklar breytingar á jöfnunarsætum sem koma í hlut þingflokkanna auk þess sem að karlar ná meirihluta á Alþingi.
Fjölmiðlar um allan heim hafa fjallað um þá staðreynd að konur hafi náð meirihluta á Alþingi og hefði Ísland orðið fyrst Evrópulanda til þess. Nú er framundan leiðréttingarherferð á því.
Þá gerast þau tíðindi að Lenya Rún Taha Karim dettur út sem jöfnunarmaður Pírata í Reykjavík Norður en í hennar stað kemur Jóhann Páll Jóhannsson. Lenya Rún hafði verið tilkynnt sem yngsti alþingismaður sögunnar en nú er allt útlit fyrir að svo verði ekki.
Jæja þetta voru góðir 9 tímar
— Lenya Rún (@Lenyarun) September 26, 2021
Guðmundur Gunnarsson fellur út sem jöfnunarmaður Viðreisnar í Norðvesturkjördæmi og í stað hans kemur Bergþór Ólason inn fyrir Miðflokkinn.
Rósa Björk Brynjólfsdóttir dettur út sem jöfnunarmaður Samfylkingarinnar í Reykjavík Suður. Í hennar stað kemur Orri Páll Jóhannsson sem jöfnunarþingmaður Vinstri grænna.
Í Suðurkjördæmi fellr Hólmfríður Árnadóttir út sem jöfnunarþingmaður Vinstri grænna og Guðbrandur Einarsson kemur inn í hennar stað sem jöfnunarþingmaður Viðreisnar.
Karl Gauti Hjaltason dettur þá út sem jöfnunarmaður Miðflokksins í Suðvesturkjördæmi en það sæti tekur Gísli Rafn Ólafsson, þingmaður Pírata.