Ljóst er að Sósíalistaflokkur Íslands náði ekki kjöri í Alþingiskosningunum sem nú er að ljúka. Enn á eftir að skila lokatölum í nokkrum kjördæmum en flokkurinn er nú með 3,9% fylgi á landsvísu. Sterkasta vígi flokksins var í Reykjavík norður þar sem leiðtogi flokksins, Gunnar Smári Egilsson, var í framboði. Alls hlaut flokkurinn 5,6% fylgi í kjördæminu en það dugði ekki til og vantaði sósíalistaforingjanum rúmlega 700 atkvæði uppá að til að vera kjördæmakjörinn.
Það var þó enginn uppgjafartónn í Gunnari Smára en í viðtali við RÚV í nótt, þegar fyrstu tölur voru komnar og gáfu ekki góð fyrirheit, sagði hann að flokkurinn myndi einfaldlega fara inn næst ef ekki tækist að ná þingsæti í ár.
Á Facebook-síðu Sósíalistaflokksins má þó lesa að margir Sósíalistar eru í öngum sínum með niðurstöðuna. Íhuga sumir að flýja land og aðrir velta fyrir sér hvort að rétt væri að breyta nafni flokksins útaf fordómum Íslendinga í garð sósíalista. Sama stefna yrði þó við lýði.
Aðrir reyna þó að horfa jákvætt á stöðu mála og hvetja félaga sína til dáða.
„Kæru félagar, við verðum að passa okkur á að detta ekki yfir í einhvers konar almenna fyrirlitningu á kjósendum. Að vera sósíalisti þýðir að vera mannvinur. Í því felst ákveðinn sjálfsagi, sérstaklega þegar hlutirnir virðast ekki vera að ganga vel. Það er einnig mikilvægt að hafa í huga að okkar barátta er maraþon, ekki spretthlaup,“ segir annar ónefndur sósíalisti.
Það er þó ljóst hverjum Þór Saari, sem skipaði annað sætið Sósíalistaflokksins í Suðvesturkjördæmi, kennir um ófarirnar, Sjálfstæðisflokknum og Morgunblaðinu. Skömmu fyrir lok kjördag sagði hann flokkinn og fjölmiðilinn hafa á að skipa ógeðslegu og siðlausu fólki sem einskis svífst.