Indriði H. Þorláksson, fyrrum ríkisskattstjóri, tilkynnir í grein á heimasíðu sinni að hann hyggist breyta til og kjósa nýjan flokk í alþingiskosningunum sem nú standa yfir. Indriði hefur verið traustur liðsmaður Vinstri Grænna í gegnum árin og var meðal annars á framboðslista flokksins í kosningunum árið 2016.
Segir það sitt að þegar Steingrímur J. Sigfússon, nýorðinn fjármálaráðherra í minnihlutastjórn Samfylkingar og Vinstri grænna árið 2009, þá bað hann Indriða um að aðstoða sig og taka að sér ráðuneytisstjórastöðu fjármálaráðuneytisins tímabundið.
Það vekur því nokkra athygli að Indriði hyggst ekki veita Vinstri Grænum atkvæði sitt í þessum kosningum. Í pistli á heimasíðu sinni rifjar hann upp að hann hafi áður greint frá þeim meginatriðum sem hann vildi sjá í stefnu þeirra flokka sem til álita kæmu, stjórnarskrámálið og auðlindir þjóðarinnar, ábyrg ríkisfjármalastefna og skynsamleg úrvinnsla COVID-19 vandans, viðspyrna við auðsöfnun og auðræði, sanngjarnt og réttlátt skattkerfi og skilvirk skattframkvæmd.
Auk skýrrar stefnu skipti trúverðugleiki og traust miklu máli. „Með tillit til þess hef ég gert upp huga minn og ákveðið hvar atkvæð mitt lendir,“ skrifar Indriði og lýsir svo yfir stuðningi við Samfylkinguna sem hann telur hafa lagt fram stefnu í þessum málum og öðrum sem best falli að hugmyndum sínum.
„Jafnframt teflir hún fram breiðri forystu fólks sem býr yfir reynslu, þekkingu og kunnáttu og hefur í verkum sínum og málflutningi verið faglegt og málefnalegt. Ég treysti því til að fylgja stefnu sinni eftir og leita samstarfs við aðra þá flokka sem hafa áþekka grundvallarsýn á það sem skiptir máli fyrir það siðaða samfélag sem við viljum flest lifa í. Ég mun því kjósa Samfylkinguna.“