Ökumaður missti stjórn á bíl sínum á Sandgerðisvegi í vikunni með þeim afleiðingum að bíllinn endaði úti í móa. Sem betur fer slapp ökumaðurinn ómeiddur.

Þetta kemur fram í tilkynningu frá Lögreglunni á Suðurnesjum þar sem farið er yfir nokkur verkefni vikunnar. Einnig er greint frá því að nokkur þjófnaðarmál hafi komið upp, meðal annars var lömpum stolið úr gróðurhúsi.  Þá var brotist inn í vinnuskúra og verkfærum stolið, voru einnig unnin skemmdarverk á staðnum.

Slys varð þegar maður féll í stiga sem hann stóð í við vinnu sína. Hann fann til verkja og var fluttur til læknis til frekari skoðunar.

Nokkrir ökumenn voru svo kærðir fyrir of hraðan akstur eða teknir úr umferð vegna gruns um vímuefnaakstur. Fáeinir óku án ökuréttinda og skráningarnúmer voru fjarlægð af sex bílum sem voru óskoðaðir eða ótryggðir.