Töluverður erill var hjá lögreglu í gær og nótt og voru um 100 mál skráð frá kl.17 í gær til 5 í morgun. Bar þar mikið á ökumönnum sem voru stöðvaðir drukknir eða undir áhrifum fíkniefna.

Maður kastaði stól í gegnum rúðu á veitingastað í miðbænum og hljóp burtu af vettvangi, að því er fram kemur í dagbók lögreglu til fjölmiðla. Ekki er nánar greint frá atvikinu.

Maður var handtekinn í hverfi 104 vegna líkamsárásar og heimilisofbeldis, var hann vistaður í fangaklefa.

Þá greinir frá hópslagsmálum ungmenna í Kópavogi í nótt eða gærkvöld. Var mikill fjöldi ungmenna að slást en er lögregla kom á staðinn leystist hópurinn upp.

Fimm menn voru handteknir í Kópavogi vegna líkamsárásar, segir einnig í dagbókinni.