Úrskurður var kveðinn upp í máli við Héraðsdóm Norðurlands eystra í gær þar sem fráskilinn eiginmaður krafðist þess að kaupmáli sem hann og fyrrverandi eiginkona hans höfðu gert með sér yrði ógiltur. Konan hafnaði þessu og gerði ennfremur í málinu kröfu um að sjö ökutæki sem maðurinn keypti í sambúð þeirra yrðu felld undir fjárskipti búsins. Sex af þeim ökutækjum eru fágæt Honda mótorhjól, árgerðir frá 1967 til 1979, þar á meðal Honda CB750 Sandcast, árg. 1969.
Parið kynntist árið 2005 og þá um vorið seldi konan íbúð sem hún átti og keypti í staðinn einbýlishús á Akureyri. Hún keypti líka ein fyrirtæki nokkurt. Parið gekk í hjónaband sumarið 2009. Í dómnum segir að það liggi fyrir að við upphaf hjúskaparins hafi konan átt húsið með tiltölulega litlum áhvílandi lánum og fyrirtækið hafi hún átt ein. Maðurinn hafi á hinn bóginn verið eignalaus og skuldugur.
Í janúar árið 2019 undirrituðu hjónin kaupmála þar sem meðal annars kom fram að húsið yrði séreign konunnar. Fjórum dögum eftir undirritun kaupmálans sleit konan samvistum við manninn og rak hann að heiman. Greinir þau á um ástæður fyrir þessu. Konan segist hafa gert þetta í kjölfar samtals á milli þeirra sem átti sér stað eftir að kaupmálinn hafði verið gerður. Ástæðurnar að baki þessu hafi verið þær að maðurinn hefði ekki stutt við bakið á henni í veikindum hennar og ítrekað brotið gegn henni í hjónabandinu. Er óumdeilt að maðurinn keypti sér aðgang að stefnumótasíðu án vitneskju konunnar.
Við opinber skipti á búi hjónanna haustið 2020 var tekist á um skipti á sumarbústað, sumarhúsalóð, fasteign á Spáni og 27 véknúin ökutæki ásamt verkfærum, tækjum, varahlutum og innbúi, að ógleymdu einbýlishúsinu en maðurinn krafðist þess að það kæmi til skipta en yrði ekki séreign konunnar. Tókst ekki að sætta aðila á skiptafundi og maðurinn höfðaði mál fyrir héraðsdómi til ógildingar kaupmálanum.
Maðurinn krafðist þess að litið yrði á kaupmálann ekki sem slíkan heldur sem fjárskiptasamning. Þar sem konan hefði verið búin að ákveða að skilja við hann þegar kaupmálinn var gerður væri kaupmálinn sem slíkur ógildur á grundvelli 2. málsgr. 95. gr. hjúskaparlaga, en þar segir:
„Nú hafa hjón vegna væntanlegs skilnaðar að borði og sæng eða lögskilnaðar gert samning um fjárskipti sín og er þá unnt að fella hann úr gildi að nokkru eða öllu með dómi ef hann var bersýnilega ósanngjarn á þeim tíma er til hans var stofnað. Dómsmál skal höfða innan árs frá fullnaðardómi til skilnaðar eða frá útgáfu leyfisbréfs til skilnaðar. Tímafrestir þessir eiga þó ekki við ef freistað er að hnekkja samningi með stoð í reglum um fjármunaréttarsamninga.“
Maðurinn gerði ógildingarkröfuna einnig á grunni þess að ekki hefðu verið viðstaddir vottar að undirskrift hjónanna.
Í stuttu máli hafnaði héraðsdómur flestum kröfum mannsins. Var kaupmálinn talinn hafa verið löglega gerður og kröfur um að hann sé skilgreindur sem fjárskiptasamningur haldlausar. Hins vegar féllst dómurinn á að einhver af mótorhjólunum sem deilt var um væru eign mannsins enda hefði hann keypt þau með eigin fjármunum.
Málskostnaður var felldur niður.
