Vinkonurnar Sunneva Einarsdóttir, Kristín Pétursdóttir, Birgitta Líf Björnsdóttir, Magnea Björg Jónsdóttir, Hildur Sif Hauksdóttir, Ína María Norðfjörð og Ástrós Traustadóttir fengu sér allar eins tattú fyrir skömmuna með áletruninni LXS sem gárungarnir segja að standi fyrir lúxus.
Hafa þær síðan þá verið kallaðar LXS-dívurnar, LXS-skvísurnar eða LXS-gengið – aðallega þó af okkur hér á DV, enda er enginn í góðu gengi nema gengið hafi nafn.
Áhrifavaldana í LXS má að sjálfsögðu finna í Tekjublaði DV sem kemur út í fyrramálið og ákvað Fókus að veita lesendum smá forskot á sæluna. Reyndar vantar hér inn Kristíni Pétursdóttur, en sú skilgreinir sig ekki sem áhrifavald.
Sunneva Einarsdóttir er tvímælalaust meðal vinsælustu áhrifavalda Íslands, en hún er með yfir 42 þúsund fylgjendur á Instagram. Hún heldur jafnframt úti vinsælu hlaðvarpi með Birtu Líf Ólfasdóttir sem nefnist Teboðið.
Miðað við greitt útsvar á síðasta ári má má ætla að mánaðarlegar tekjur Sunnevu nemi 190.727 kr. á mánuði.
Birgitta Líf Björnsdóttir er áhrifavaldur með meiru en hún opnaði nýlega skemmtistaðinn Bankastræti Club þar sem goðsagnakenndi staðurinn B5 var áður til húsa. Hún er dóttir athafnahjónanna Björns Leifssonar og Hafdísar Jónsdóttur sem gjarnan eru kennd við líkamsræktarveldi þeirra World Class.
Birgitta Líf er tekjuhæst LXS-dívanna með rétt rúmlega milljón á mánuði miðað við greitt útsvar eða 1.019.943 kr. á mánuði
Magnea Björg Jónsdóttir er vinsæll áhrifavaldur á Instagram með tæplega 28 þúsund fylgjendur. Hún var lengi búsett í Beverly Hills í Bandaríkjunum þar sem hún rak lúxusbílaleigu og er með gráðu í samskiptafræði frá háskólanum í Santa Monica og BA gráðu í viðskiptafræði. Hún greindi frá því síðasta sumar að hún væri ekki hætt að mennta sig og setti markið á háskólanám í viðskiptum og stjórnun.
Magnea er með 326.724 kr. á mánuði miðað við greitt útsvar 2020.
Hilur Sif Hauksdóttir er með rúmlega 7,5 þúsund fylgjendur á Instagram, sem þykir nokkuð gott. Hún hefur einnig gert það gott í blogg-heiminum á Íslandi en hún hefur sérstakan áhuga á heilbrigðum lífsstíl. Hún er með BSc-gráðu í sálræði og hefur starfað sem samfélagsmiðlastjóri og einnig sem flugfreyja.
Hún er með 458.383 kr. á mánuði miðað við greitt útsvar 2020.
Ína María Norðfjörð er áhrifavaldur með meiru og hefur yfir sex þúsund fylgjendur á Instagram. Hún er með háskólagráðu í sálfræði og hefur starfað sem samfélagsmiðlastjóri hjá fatamarkaðnum Trendport.
Eitthvað virðist hafa verið hart í ári hjá henni á síðasta ári en miðað við greitt útsvar var hún aðeins með 40.395 kr. á mánuði.
Ástrós Traustadóttir er áhrifavaldur og dansari og margir muna eftir henni úr vinsælu þáttunum Allir geta dansað. Hún er með 15,5 þúsund fylgjendur á Instagram.
Hún er með 195.949 kr. á mánuði miðað við greitt útsvar á síðasta ári.
