„Bóluefnin við Covid 19 eru vísindalegt afrek sem gera heimsbyggðinni mögulegt að hefja eðlilegt líf að nýju. Við sjáum þau gera nákvæmlega það sem þau áttu að gera. Þau draga úr smitum og þau smit sem upp koma eru miklu vægari.“
Svona hefst pistill sem Viggó Örn Jónsson, ráðgjafi hjá Aton.JL, skrifar en pistillinn birtist á Vísi. Í pistlinum byrjar hann á að tala um svokallaða álhatta, minnihlutann sem hafnar bólusetningum. „Samsæriskenningar alls kyns hafa víða náð útbreiðslu. Í sumum nágrannalöndum segja nálægt 40% íbúa ekki vilja bólusetningu. Aukaverkanir af svo miklum fjölda bólusetninga á stuttum tíma eru auk þess afar sýnilegar og til þess fallnar að vekja áhyggjur hjá fólki sem öllu jöfnu hefur ekki áhyggjur af mun alvarlegri og algengari aukaverkunum lyfja,“ segir Viggó og bendir á að hér hefur hópur álhattanna verið minni.
„Okkur var lofað vísindalegri nálgun sem jók samstöðu þjóðarinnar. Við sættum okkur við áhættuna sem felst í styttri prófunum. Við treystum því að við værum á skynsamlegri og ábyrgri vegferð. Við sættum okkur við gróf inngrip í daglegt líf, efnahagslegt áfall og takmarkanir á ferðafrelsi. Við trúðum því að ásetningurinn væri að endurheimta eðlilegt líf. Samstaða þjóðarinnar var mikil. Fyrir vikið hefur nú tekist að bólusetja yfir 90% Íslendinga – vel yfir því markmiði sem að var stefnt.“
Viggó segir að með þessum góða árangri í bólusetningum hafi öllum markmiðum með sóttvarnaraðgerðum verið náð, samfélagið sé að verða eðlilegt. „Við höfum staðið af okkur þennan storm með öllum þeim miklu inngripum í líf okkar sem því fylgdi. Fólk hittist á ný og þjóðin er öll á ferð og flugi. Verslanir eru opnar. Skólarnir horfa fram á eðlilegt starf. Erlendir ferðamenn eru að koma til landsins,“ segir hann.
Þá leggur Viggó áherslu á að það sé ekki raunhæft að útrýma veirunni. „Það er ekki og hefur aldrei verið raunhæf hugmynd að útrýma Covid-19. Veiran mun aldrei hverfa. Við þurfum að lifa með henni. Ný afbrigði munu koma fram með nýjum smitum. Þetta er vísindaleg staðreynd og þess vegna þurfti bóluefnin,“ segir hann.
„Til þess að draga úr smitum og draga úr alvarleika veikinda. Þetta er nákvæmlega það sama og við gerum við inflúensu á hverju einasta ári. Á hverju einasta ári kemur nýtt afbrigði inflúensu, nýtt bóluefni og við smitumst mörg af „flensu“. Þannig er líka lífið eftir Covid.“
Viggó ræðir þá spurningu sem margir spyrja sig þessa dagana, virka bóluefnin þá ekki? Hann segir yfirmenn sóttvarna hér á landi hafa misst sjónar á vísindunum. „Þá vill svo til að yfirmenn sóttvarna sem hafa í heilt ár þrumað yfir þjóðinni á daglegum blaðamannafundum um mikilvægi þess að taka vísindalega afstöðu hafa skyndilega misst allan áhuga á vísindum. Allt í einu láta þau eins og almenningur sé í bráðri hættu þrátt fyrir að bólusetningarmarkmiðum sé náð,“ segir hann.
„Skilaboðin sem heilbrigðisráðherra og íslensk sóttvarnaryfirvöld eru að senda frá sér með því að grípa aftur til grófra inngripa í líf almennings eru einfaldlega þau að bóluefnið virki ekki. Þetta er mjög alvarlegt vantraust á þá vísindalegu vegferð sem þjóðin hélt að hún væri á.“
Hann segir að þetta sé ekki flókið, markmiðum bólusetninga hefur verið náð. „Annað hvort virka bóluefnin og við getum hætt aðgerðum eða bóluefnin virka ekki og við þurfum að halda þeim áfram. Hvort er það?“
„Hættan vegna þessara smita er hverfandi“
Að lokum ræðir Viggó um orðin sem Þórólfur Guðnason sóttvarnalæknir lét falla í gær þar sem hann sagði að aðgerðir gegn veirunni gætu varað í einhver ár. „Spænska veikin gekk yfir árið 1918. Influensan er enn að hringsóla um heiminn. Ef við ætlum að halda áfram að hegða okkur svona og bíða eftir að Covid sé „búið“ gætu „einhver ár“ orðið ansi mörg,“ segir hann.
„Við erum bólusett. Hættan vegna þessara smita er hverfandi. Það er kominn tími til að almenningur og stjórnmálin ræði þetta mál rætt af einhverri skynsemi í stað þess að stæra sig af því hlýða án hálfrar hugsunar.“
