„Mér þykir vænt um Háskóla Íslands. Ég er útskrifaður frá Háskóla Íslands, ég hef kennt við háskóla Íslands, ég var í mörg á formaður í ráðgjafanefnd Verkfræðdeildar Háskóla Íslands. Í nærfellt fjögur ár hef ég orðið vitni að afgreiðslu háskólans á máli doktorsnema, afgreiðslu sem er með slíkum endemun að ég fæ ekki orða bundist.“
Svona hefst pistill sem verkfræðingurinn Guðmundur G. Þórarinsson skrifar en pistillinn birtist í Morgunblaðinu. Í pistlinum segir Guðmundur Háskóla Íslands til syndanna vegna meðferðar skólans á nemenda nokkrum sem er þó ekki nafngreindur í pistlinum.
„Byggingarverkfræðingur sem vann í 10 ár hjá virtri ráðgjafaverkfræðistofu í Bandaríkjunum fluttist heim til Íslands með mjög góð meðmæli frá vinnuveitanda sínum og fékk vinnu hjá Rannsóknamiðstöð Háskóla Íslands í jarðskjálftaverkfræði á Selfossi eftir að hafa unnið sem sjálfstætt starfandi verkfræðingur. Eftir um árs starf hjá rannsóknamiðstöðinni kom forstöðumaður stofnunarinnar að máli við verkfræðinginn og stakk upp á að hún ritaði doktorsritgerð um jarðskjálftaálag á lagnir í jörðu. Eftir Suðurlandsskjálftann 2008 var slíkt álag á frárennslislagnir í Hveragerði mjög til umræðu.“
Guðmundur segir nemendann hafa hafist handa en nokkru síðar hafi forstöðumaðurinn veikst og látist. „Hann hafði þá sent frá sér stöðurit þar sem hann sagði að um 30% doktorsritgerðarinnar væri lokið. Nokkru síðar var lausráðinn Nepalbúi við háskólann ráðinn leiðbeinandi við ritgerðina. Doktorsneminn hafði þá fengið vilyrði um styrk frá Rannís, ca. 7-8 m.kr. sem sent var Verkfræðideild háskólans til umsýslu.“
„Var greinilega undir þrýstingi frá deildarforsetanum“
Guðmundur segir að neminn hafi þó aldrei fengið neitt greitt af styrknum. „Hún óskaði eftir að fá styrkinn greiddan mánaðarlega sem verktakagreiðslu. Ástæða þess var að hún hafði eytt verulegum tíma og upphæðum í að fara yfir ljósmyndir af lögnum í Hveragerði frá síðasta skjálfta og þurfti að kosta smíði stálmóta til prófunar á steinsteyptum frárennslisrörum. Henni var tjáð að hún fengi ekki þennan kostnað dreginn frá skatti ef styrkurinn væri greiddur út sem laun,“ segir hann í pistlinum.
„Deildarforseti verkfræðideildar neitaði því þrátt fyrir fordæmi um þannig meðferð styrks og vildi að hún hætti við tilraunir sem hún og leiðbeinandi höfðu talið nauðsynlegar og gert um skriflegt samkomulag. Varð af þessu verulegur núningur milli nemans og deildarforsetans. Nepalbúinn reyndist hafa lítinn tíma eða áhuga á að aðstoða doktorsnemann. Hann tjáði doktorsnemanum að ef hún leysti ekki ágreininginn við deildarforsetann kæmi hann ekki nálægt verkefni hennar meira. Var greinilega undir þrýstingi frá deildarforsetanum sem átti erfitt með að fyrirgefa doktorsnemanum ákveðna afstöðu hennar.“
„Verkfræðideildin sá ekki ástæðu til að biðja nemann afsökunar“
Guðmundur segir að nemanum hafi á þessum tíma verið gert að taka miðbikspróf sem hún gerði og skilaði um 35 blaðsíðna ritgerð í júní árið 2017. „Síðan hélt hún áfram áhyggjulaus vinnu að ritgerðinni án þess að fá vitneskju um niðurstöðu prófsins. Um viku eftir prófið sendi nemandi inn útdrátt af grein á Evrópska jarðskjálftaráðstefnu, sem halda átti í Grikklandi sumarið 2018. Útdrátturinn var samþykktur og í framhaldinu skilaði neminn inn greininni og kynnti á ráðstefnunni,“ segir hann.
„Fékk ekki prófsýningu þrátt fyrir ákvæði þar um í reglugerðum háskólans. Í ágúst 2017, rúmum tveim mánuðum eftir próftökuna, tilkynnti skrifstofa háskólans henni bréflega að hún hefði fallið á prófinu og í sama bréfi rekin úr háskólanum.“
Guðmundur segir að viku eftir prófið hafi styrknum sem neminn fékk verið skilað til Rannís. „Þá án hennar vitundar og áður en niðurstaða prófs lá fyrir. Allt án þess að neminn gerði sér grein fyrir hvað væri að gerast,“ segir hann.
„Hún fékk engar skýringar og hófst nú þriggja ára viðleitni hennar til að rétta hlut sinn. Hún kærði þessa málsmeðferð til sérstakrar kærunefndar, sem tók málið fyrir. Formaður nefndarinnar var Björg Thorarensen, núverandi hæstaréttardómari. Úrskurður kærunefndarinnar var óvenjulegur.“
Þá segir hann að í úrskurði kærunefndarinnar hafi komið fram að brotið hafi verið alvarlega á doktorsnemanum, allar ákvarðanir verkfræðideildarinnar væru felldar úr gildi og deildarforseta hafi verið falið að taka málið fyrir að nýju og fara að lögum.
„Verkfræðideildin sá ekki ástæðu til að biðja nemann afsökunar eða taka neina af ákvörðunum sínum upp.“
„Væntanlega fyrir vel unnin störf!!!“
Guðmundur segir að ólíklegt sé að Nepalbúinn hafi ákveðið sjálfur að leysa upp doktorsnefndina, skila styrknum og reka nemann úr náminu. „Yfirmenn verkfræðideildar sem stöðugt lýsa því að þeir séu ekki vanhæfir við ákvarðanatöku í málinu hljóta að hafa stýrt Nepalbúanum,“ segir hann.
„Að þessum þætti loknum fastréð verkfræðideildin Nepalbúann og valdi hann sem varaforseta verkfræðideildarinnar. Væntanlega fyrir vel unnin störf!!!“
Segir prófdóminn hafa verið ritaðan af mikilli óvild
Guðmundur segir að þrátt fyrir að þekking hans á jarðskjálftaverkfræði sé takmörkuð hafi hann séð að prófdómur Nepalbúans var ritaður af mikilli óvild. „Hann virðist hafa fengið öðrum doktorsnefndarmönnum dóm sinn til undirritunar og meðvirkni skilar árangri,“ segir hann.
„Doktorsneminn fór fram á að fá óháðan prófdómara skipaðan. Háskólinn vísaði málinu frá nefnd til nefndar, sem allar tóku óheyrilegan tíma til úrskurðar og það var ekki fyrr en umboðsmaður Alþingis tilkynnti háskólaráði að ráðið gæti ekki vísað slíkum ákvörðunum til lægra settra nefnda, að úrskurður kom sem skyldaði háskólann til að skipa óháðan prófdómara. Hafði málið þá gengið milli aðila í háskólanum í rúm þrjú ár, þrátt fyrir stöðuga eftirfylgni doktorsnemans“
Hann segir þá að það sé ljóst að verkfræðideildin hljóti að hafa haft verulegar áhyggjur af þessu máli og orðstír sínum. „Skyldi maður nú ætla að æðsta menntastofnun landsins mundi ganga þannig frá málinu eftir það sem á undan var gengið, að ekki orkaði tvímælis eða ylli ágreiningi um réttláta niðurstöðu.“
„Enginn rökstuðningur fylgir“
Þegar hingað er komið við sögu segir Guðmundur að neminn hafi fengið virtan prófessor í jarðskjálftafræðum við háskóla í Suður-Kaliforníu til að fara yfir prófúrlausn sína. „Niðurstaða hans var að einkunn ætti að vera 7, ekki brilljans en vel staðið próf. Þannig var í vændum að dómi Nepalbúans yrði hnekkt og öll aðkoma verkfræðideildar að málinu yrði þeim stórlega til vansa,“ segir hann.
„Verkfræðideildin þráaðist þó við og skipaði sem óháðan prófdómara aðjunkt við háskólann í Nepal sem hefur starfað sem prófessor við háskólann í Nepal meðan Nepalbúinn var þar, og er kunningi, vinur, Nepalbúans. Prófessor þessi hafði unnið með Nepalbúanum og starfsmanni rannsóknamiðstöðvarinnar á Selfossi að ritun sex fræðigreina. Auðvelt er því að draga þá ályktun að þessi Nepalaðjunkt væri vel kunnugur máli doktorsnemans, eftir vinnu með rannsóknastöðinni, máli sem verið hafði í brennidepli í miðstöðinni í þrjú ár. Augljóslega er þessi nýi prófdómari vanhæfur.“
Guðmundur segir að úrskurður þessa prófdómara hafi aðeins verið ein málsgrein þar sem fram kom að hann fallist á niðurstöðu Nepalbúans, sem Guðmundur segir að sé kunningi hans. „Enginn rökstuðningur fylgir og doktorsneminn fær ekki að sjá slík gögn þrátt fyrir ákvæði háskólans um prófsýningu.“
„Ætti að leiða til afsagnar forystumanna verkfræðideildar“
Að lokum segir Guðmundur að hann hafi í mörg ár verið formaður siðanefndar VFÍ, Verkfræðingafélags Íslands, og að hann efist ekki andartak um að deildarforsetar verkfræðideildar og Nepalbúinn myndu hljóta veruleg ámæli ef mál þetta færi fyrir siðanefndir háskólans og VFÍ.
„Þegar ég var í stjórnmálum var talsverð umræða um að stjórnmálamenn ættu ekki að koma að stjórn háskólans né deildum hans. Nú er mér ljóst að veruleg hætta er á misbeitingu embættismanna í þessu fámenna, vina- og skyldleika þjóðfélagi okkar. Menn virðast geta haft opinn leikvöll fyrir skapbresti sína. Opin umræða í okkar þjóðfélagi um mál sem þetta ætti að leiða til afsagnar forystumanna verkfræðideildar,“ segir hann.
„Háskólinn verður að skipa óháðan prófdómara, ef til vill tvo, og leiða málið til lykta þannig að ekki verði efast um réttlæti og sanngirni.“