Á sjöunda tímanum í gær hafði lögreglan afskipti af manni, sem var í annarlegu ástandi, á sóttvarnarhóteli þar sem hann dvelur. Maðurinn hafði valdið öðrum gestum ónæði og hafði haft í hótunum við einn gest. Maðurinn er einnig grunaður um eignaspjöll og fleira.

Á sjötta tímanum í gær féll 17 ára maður af mótorkrosshjóli við Tungumela í Mosfellsbæ. Hann hlaut áverka á baki og var fluttur á Bráðadeild með sjúkrabifreið.

Á áttunda tímanum í gær var ekið á bifreið í Árbæ og ók tjónvaldur síðan greitt af vettvangi og gegn rauðu ljósi á gatnamótum. Lögreglumenn höfðu uppi á honum við heimili hans og handtóku hann. Hann er grunaður um að hafa verið undir áhrifum áfengis og fíkniefna, ítrekaðan akstur sviptur ökuréttindum, vörslu fíkniefna og fleira. Hann var vistaður í fangageymslu.

Sex ökumenn voru handteknir í gærkvöldi og nótt grunaðir um að vera undir áhrifum áfengis og/eða fíkniefna. Þrír þeirra reyndust vera sviptir ökuréttindum og tveir án réttinda.