Sölvi Tryggvason fjölmiðlamaður tjáði sig í dag um slúður sem gengið hefur á milli manna seinustu vikur. Sagan var sú að þjóðþekktur einstaklingur hafi gengið í skrokk á vændiskonu og verið handtekinn fyrir það. Þjóðþekkti einstaklingurinn átti að vera Sölvi.

Sölvi sagði söguna vera uppspuna og afsannaði hann hana með því að sýna málaskrá sína hjá lögreglunni. Hún var auð og sýndi Sölvi því fram á að ef sagan er rétt, þá er það að minnsta kosti ekki hann sem er þessi þjóðþekkti einstaklingur.

Sölvi birti málaskránna bæði á Instagram og Facebook-síðu sinni og hefur fjöldi fólks sent á hann kveðjur í gegnum færslurnar. Björgvin Halldórsson söngvari segir að þetta sé gjaldið sem þeir þekktu þurfi að greiða fyrir frægðina.

Ebba Guðný Guðmundsdóttir, heilsukokkur og matreiðslubókahöfundur, segir að hún eigi erfitt að finna orð þar sem þetta sé svo ljótt og óskar honum góðs gengis.

„Úff hvað er til andstyggilegur illvilji. Láttu það sem vind um eyru þjóta. Engin heilvita manneskja mun taka þátt í þessari heimskulegu aðför og þú stendur sterkari eftir. Lofa þér því,“ skrifar Bergþór Pálsson, tónlistarmaður og skólastjóri.

Hannes Hólmsteinn Gissurarson segir Sölva eiga alla sína samúð og rifjar upp reynslu sína á slúðri sem ekki reyndist vera satt.

„Slúður er valdabarátta hinna valdalausu, tilraun þeirra til að höggva í þá, sem eru uppi á sviðinu hverju sinni. Sjálfur hef ég lent í slíku slúðri, og það hefur ekkert gert mér. Þegar við áttum nokkrir í höggi við valdamikinn auðjöfur (ekki Jón Ásgeir), setti sá af stað fáránlegar og tilhæfulausar slúðursögur um mig, sem ég vildi ekki gefa líf með því að endurtaka þær,“ skrifaði Hannes í ummælakerfinu á færslu Sölva.

Íslendingar á Twitter hafa einnig rætt málið en þar hófust umræður fyrr í vikunni þar sem fjölmiðlar voru sakaðir um þöggun vegna þess að ekki hafi verið fjallað um málið sem reyndist ekki vera satt.

Flestir skrifa þó í dag að fólk eigi ekki að treysta öllu slúðri sem það heyrir. Einnig er minnt á að þó þetta mál hafi verið uppspuni, þá séu margir ofbeldismenn sem ekki hafa þurft að gjalda fyrir verk sín.

Væri fínt ef þessir svokölluðu inflúensarar héldu kjafti með hálf sagðar sögur svo samfélagið fari ekki að taka fleiri einstaklinga af lífi..

— Þorgrímur S Ólafsson (@ThorgrimurSmari) May 3, 2021

Ok, allir segja sama nafnið.

En gleymum því ekki að hér er í raun um óstaðfesta slúðursögu að ræða þar til annað kemur í ljós. #égstendmeðhenni auðvitað, alltaf. en hver sem er getur líka komið svona orðrómi af stað án staðfestra heimilda. https://t.co/tcrooOxMty

— Auður Kolbrá (@AudurKolbra) May 3, 2021

Jæja, leggið niður heygafflana trúðarnir ykkar.

— Jóhannes Haukur (@johanneshaukur) May 3, 2021

Ofbeldismenn eru ekki allir í svörtum hettupeysum að fela sig í húsasundum. Þeir eru líka sætir fjölskyldumenn sem starfa í fjölmiðlum. Það að þeir komi vel fram í sjónvarpinu og séu góðir við ömmur sínar útilokar það ekki að þeir beiti ofbeldi. Gerum fokking betur.

— Sólborg Guðbrands (@solborgg) May 3, 2021

Merkilegt hvernig menn sem taka aldrei þátt í umræðu sem er þolendum í hag öskra svo manna hæst þegar umræðan snýst um sakleysi mögulegra gerenda og lygasjúka þolendur

— Kolbrún Birna (@kolla_swag666) May 3, 2021

Íslendingar elska samt fyrst og fremst bara gott slúður. Mun aldrei breytast.

— Hrafn Jónsson (@hrafnjonsson) May 3, 2021