Það blasti ófögur sjón við landsmönnum sem litu á fréttamiðla í morgun til að sjá nýjustu tölur kórónuveirasmita hér á landi, 11 smit og 6 af þeim utan sóttkvíar. Nú er grunur um að einstaklingur sem framvísaði mótefnavottorði á landamærunum hafi smitast aftur af veirunni við komuna til landsins.
Hjördís Guðmundsdóttir, upplýsingafulltrúi almannavarnadeildar ríkislögreglustjóra, segir í samtali við DV að verið sé að skoða alla möguleika þegar kemur að því hvernig þetta hópsmit byrjaði. „Það er verið að kanna þetta,“ segir hún.
Blaðamaður spurði hvort það gæti verið að einstaklingurinn sem um ræðir hafi ekki fengið veiruna áður og að vottorðið væri þá falsað. „Það er verið að kanna allt, það er verið að raðgreina smitið og þar af leiðandi komumst við vonandi að því hvernig er í pottinn búið. En vottorðið virtist vera bara eins og það átti að vera.“
Hjördís segir að það sé mjög óvenjulegt að fólk sem áður hefur fengið veiruna smitist aftur af henni. „Mjög óvenjulegt, ef það er,“ segir hún en einstaklingurinn sem framvísaði vottorðinu um mótefni greindist þrátt fyrir það með smit hér á landi. „Hann greinist með Covid en þú getur greinst með ákveðin gildi og allt þetta, við erum bara að skoða allt.“