Að minnsta kosti tveir fyrrverandi starfsmenn Samherja eru á óskalista ákæruvaldsins í Namibíu. Ákæruvaldið vill fá starfsmennina, þá Egil Helga Árnason og Aðalstein Helgason, framselda til sín. Þetta er á meðal þess sem fram kom í málflutningu ríkissaksóknara landsins í dag en Stundin greindi frá hér á landi.
Stundin vísar í namibíska fjölmiðla en þar kemur fram að Egill og Aðalsteinn hefðu ekki komið fyrir dóminn í dag þar sem ríkið væri ekki búið að klára framsalsbeiðnir að fullu gegn þeim. Þetta gefur í skyn að namibíska ákæruvaldið vilji fá þá Egil og Helga framselda frá Íslandi svo hægt verði að rétta yfir þeim í Namibíu. Egill og Aðalsteinn eru báðir ákærðir í málinu sem um ræðir. Þeir eru ákærðir fyrir fjársvik eða tilraun til fjársvika og peningaþvætti.
Helgi Magnús Gunnarsson, vararíkissaksóknari á Íslandi, ræddi við Stundina um málið og var skýr í sínu máli: Íslenskir ríkisborgarar verða ekki framseldir til Namibíu. „Lögin segja skýrt að íslensk stjórnvöld framselja ekki íslenska ríkisborgara til Namibíu,“ segir hann í samtali sínu við Stundina um málið.
Ástæðan fyrir því að þeir Egill og Aðalsteinn verða ekki framseldir til landsins er einföld, enginn framsalssamningur er í gildi á milli þessara tveggja landa.