Héraðsdómur Reykjavíkur dæmdi í gær Ingvar Árna Ingvarsson í níu mánaða fangelsi fyrir hættubrot, en þann 9. mars 2019 beindi Ingvar skammbyssu af gerðinni Ruger út um glugga heimili síns og hleypti af fjórum skotum í átt að tveim mönnum sem þar stóðu. Á meðan Ingvar skaut að þeim leituðu mennirnir skjóls á bílastæði fyrir utan heimili ákærða.
DV sagði ákærunni í október á síðasta ári.
Þá var Ingvar í sama máli sakfelldur fyrir fíkniefna- og vopnalagabrot, en ári fyrir skotárásina fundu lögreglumenn umtalsvert magn af amfetamíni, kókaíni, e-pillum, sterum, íblöndunarefni, afsagaða haglabyssu og hvellbyssu auk skotfæra í vopnin á heimili Ingvars.
Meðal gagna í málinu var svarthvít myndbandsupptaka þar sem sjá mátti mennina tvo koma á svæðið með leigubíl og láta illum látum fyrir utan heimili Ingvars. Segir í dómnum að þeir virtust vera að kasta hlutum að eða í húsið, láta dólgslega og sparka í bifreiðir á svæðinu. Um sjö mínútum síðar, segir jafnframt í dómnum, sáust mennirnir „taka viðbragð“, annar þeirra hljóp út í myrkrið en hinn skýldi sér fyrst á bak við bíla á bílastæðinu, áður en hann svo fylgdi félaga sínum af vettvangi.
Við rannsókn tæknideildar lögreglunnar á höfuðborgarsvæðinu fundust skotför í BMW bifreið sem renndi stoðum undir frásögn mannanna af atburðum. Þá fundust strokför eftir hendi á bílunum auk þess sem bjórflaska og jakki fundust á götunni við bílana. Þótti það renna stoðum undir þá sögu mannanna að þeir hefðu þurft að forða sér í flýti af vettvangi.
Við skýrslutöku hjá lögreglu sagði Ingvar að mennirnir hefðu haft í hótunum við sig og að kveikt hefði verið í húsi hans árið áður. Sagði Ingvar þá fyrir dómi að þegar unnusta sagði honum frá því að þessir sömu menn væru nú staddir fyrir utan heimili hans hefði hann gripið skammbyssuna umræddu, beint henni út um glugga og miðað á skjólvegg fyrir utan húsið hans. Ætlunin, sagði Ingvar, var aldrei að valda tjóni.
Annar mannanna sem skotið var að sagði fyrir dómi að augljóst væri að Ingvar hefði miðað byssunni að sér. Þegar hann faldi sig á bak við jeppabifreið skaut Ingvar að bifreiðinni og sagðist maðurinn hafa heyrt skotin lenda í bifreiðinni þar sem hann faldi sig. „Vitnið hefði heyrt dynk í bifreið þegar byssukúla lenti á henni. Þá hefði ákærði kallað út um gluggann að þeir yrðu drepnir,“ segir í lýsingu á vitnisburði mannsins í dómnum.
Hinn maðurinn sagðist lítið muna eftir atvikunum umræddu, „þau væru öll í móðu hjá honum.“
Við ákvörðun níu mánaða fangelsisrefsingar leit dómarinn meðal annars til þess að Ingvar ætti langan sakaferil að baki, en hann hefur meðal annars verið dæmdur fyrir hótanir, ólögmæta nauðung og fíkniefnalagabrot. Þá var hættustig og grófleiki brotsins einnig metið til refsiþyngingar. Til málsbóta horfði þó, við ákvörðun refsingarinnar, að Ingvar hafi greint satt og rétt frá atvikum er vörðuð hluta ákærunnar.