Klukkan 02.49 í nótt var tilkynnt um eld í gömlu sumarhúsi við Elliðavatn. Slökkvilið og lögregla fóru á vettvang. Bústaðurinn var alelda og brann til kaldra kola. Ekki er vitað um eldsupptök. Í Breiðholti kom kona ein í samkvæmi um miðnætti og kýldi gestgjafann, sem einnig er kona, í andlitið. Hún skarst á augabrún og var flutt með sjúkrabifreið á Bráðadeild. Ofbeldiskonan var farin af vettvangi þegar lögreglan kom.

Á Seltjarnarnesi var tilkynnt um húsbrot, þjófnað, eignaspjöll og nytjastuld bifreiðar á ellefta tímanum í gærkvöldi. Yfirhöfn var stolið á veitingahúsi. Í henni voru lyklar að íbúð og bifreið. Þjófurinn fór inn á heimilið og stal verðmætum og bifreiðinni. Málið er í rannsókn.

Á sjötta tímanum í gær var kona handtekinn í Kópavogi grunuð um sölu og dreifingu lyfja. Hald var lagt á lyf. Konan var látin laus að skýrslutöku lokinni.

Um klukkan 20 var ofurölvi kona handtekin í Breiðholti og vistuð í fangageymslu.

Ökumaður var handtekinn í Árbæ um klukkan eitt í nótt en hann er grunaður um að hafa verið undir áhrifum fíkniefna.

Á fjórða tímanum í nótt var ökumaður handtekinn í Miðborginni. Hann er grunaður um að hafa verið undir áhrifum fíkniefna og ítrekaðan akstur sviptur ökuréttindum. Hann er einnig grunaður um nytjastuld bifreiðar, misnotkun skráningarmerkja og fleiri brot. Hann og farþegi í bifreiðinni voru vistaðir í fangageymslu.