Skömmu fyrir klukkan 20 í gærkvöldi var tilkynnt um rán í Hlíðahverfi. Tveir menn höfðu ógnað þeim þriðja með eggvopni og tekið fjármuni af honum. Þeir komust undan en lögreglan telur sig vita hverjir voru að verki. Málið er í rannsókn.

Um miðnætti var ölvuð ung kona handtekin í Vesturbænum. Hún hafði verið til ama á tónleikum. Hún hafði meðal annars neitað að bera andlitsgrímu, hrækt á starfsfólk, slegið til þess og klórað. Hún var flutt á lögreglustöð og látin laus eftir viðræður. Hún á kæru yfir höfði sér.

Á tíunda tímanum í gærkvöldi var tveimur ölvuðum mönnum vísað á brott frá sundstað í Miðborginni en þeir höfðu verið með leiðindi við starfsfólk vegna þess að þeir fundu ekki skóna sína.

Skömmu fyrir miðnætti höfðu lögreglumenn afskipti af starfsemi veitingastaðar í Miðborginni eftir að lögreglumenn sáu 6 manns yfirgefa staðinn með áfengisflöskur. Grunur leikur á að sóttvarnalög hafi verið brotin sem og lög um veitingastaði.

Tveir ökumenn voru handteknir á ellefta tímanum í gærkvöldi grunaðir um að vera undir áhrifum áfengis og/eða fíkniefna. Annar þeirra er grunaður um vörslu fíkniefna og brot á vopnalögum. Hinn lenti í árekstri áður en hann var handtekinn. Hann var vistaður í fangageymslu.

Á fimmta tímanum í nótt var tilkynnt um umferðarslys í Grafarholti. Bifreið hafði verið ekið á ljósastaur. Ökumaðurinn var fluttur á Bráðadeild en hann sagðist hafa sofnað við aksturinn.