Með tilkomu Ómíkronafbrigðis kórónuveirunnar breyttist heimsfaraldurinn að vissu leyti því bóluefni virðast ekki veita mikla vörn gegn afbrigðinu og það er mun meira smitandi en önnur afbrigði. En þrátt fyrir þetta þá er það óbólusett fólk sem ber faraldurinn uppi hér á landi.

Fréttablaðið skýrir frá þessu í dag. Fram kemur að nýgengi smita hafi hækkað hjá öllum hópum en sé þó áberandi lægst í hópi bólusettra fullorðinna og hjá þeim sem hafa fengið örvunarskammt.

14 daga nýgengi á hverja 100.000 íbúa er 976,1 hjá óbólusettum fullorðnum en hjá fullbólusettum er það 675,3. Hjá þeim sem hafa fengið örvunarskammt er nýgengið aðeins 147,3.

90% landsmanna, 12 ára og eldri, hafa lokið bólusetningu eða rúmlega 283.000 manns. Rúmlega 154.000 hafa fengið örvunarskammt.

Þegar sjúkrahúsinnlagnir eru skoðaðar er munurinn enn meira afgerandi. Nýgengni óbólusettra er 32 á hverja 100.000 á síðustu tveimur vikum en hjá fullbólusettum er það aðeins 4,3%. Það er því rúmlega sjöfaldur munur á þessum hópum. Hjá þeim sem hafa fengið örvunarskammt er nýgengið ekkert og hefur verið þannig síðan 14. desember. Enn er ekki komin almennileg reynsla á sjúkrahúsinnlagnir hér á landi vegna Ómíkronafbrigðisins en Runólfur Pálsson, yfirlæknir COVID-göngudeildar, sagði fyrr í vikunni að áhrifin komi í ljós á næstu viku eða svo.

14 daga nýgengi faraldursins er nú 655,3 á hverja 100.000 íbúa og hefur aldrei verið hærra. Í fyrstu bylgju faraldursins fór nýgengið hæst í 267,2 í apríl 2020. Í annarri bylgju fór það hæst í 291,8 í október 2020. Í þriðju bylgjunni fór það hæst í 433,6 í ágúst á þessu ári.