Ragnar Freyr Ingvarsson, læknir og fyrrum yfirmaður Covid-göngudeildarinnar, segir heilbrigðisstarfsmenn hafa miklar áhyggjur af nýrri bylgju COVID og stöðunni á Landspítalanum – en þangað vanti mikið af starfsfólki og hafi enn fækkað í hópnum undanfarið. Hann hafi hins vegar heyrt frábæra hugmynd um hvernig stjórnvöld gætu bætt stöðuna með einfaldri tímabundinni aðgerð. 

Ragnar skrifar um þetta á Facebook. „En og aftur dynur á okkur bylgja af COVID smitum, sú stærsta hingað til,“ skrifar hann. Hann bendir á að fjölmiðlar hafi í gær rætt um hertar sóttvarnaaðgerðir við lista- og veitingamenn sem hafi þungar áhyggjur af stöðunni. Þeir séu ekki einir um það.

„Við, heilbrigðisstarfsfólk, höfum líka miklar áhyggjur, því þrátt fyrir að hafa endalaust bent á vankanta hefur lítið sem ekkert áorkast í að auka þanþol heilbrigðiskerfisins til að bregðast betur við þeim áföllum sem dunið hafa á okkur síendurtekið á liðnum mánuðum og árum. Við höfum hrópað okkur hás – kallandi eftir aðgerðum.“ 

Og hvað hefur verið gert?

Bendir Ragnar Freyr á að í gær hafi níu einstaklingar smitaðir af COVID verið lagðir inn á Landspítala. Það hljómi kannski ekki mikið.

 „En á sama tíma voru 32 bráðveikir sjúklingar sem komust hvorki lönd eða strönd, fastir á bráðamóttökunni. Spítalarnir okkar eru hreinlega yfirfullir af sjúklingum.“

Ragnar segir að vandi Landspítalans sé skýr. Það vanti starfsfólk, og það hafi lengi verið vitað en stjórnvöld hafi ekkert gert til að bæta stöðuna, þvert á móti hafi starfsfólki fækkað enn meira.

„Okkur vantar mannskap. Menntað heilbrigðisstarfsfólk til að sinna bráðveikum sjúklingum – hvort sem þeir eru með COVID eða ekki. Öllu þessu fólki þarf að sinna.

Og hvað hefur verið gert til að mæta þörfum heilbrigðisstarfsfólks – í stuttu máli EKKERT – ekkert hefur verið gert annað en að kalla það inn úr fríum og biðja það að vinna aukavaktir. Ef eitthvað, hefur starfsfólki fækkað, það hefur snúið sér að öðrum störfum.“

Gæti þessi hugmynd gert gæfumuninn

Ragnar segir að hjúkrunarfræðingur á Landspítalanum hafi komið með góða hugmynd sem Ragnar telur að gæti lagað stöðuna. Að heilbrigðisstarfsfólk fái heilt ár þar sem það þurfi ekki að greiða ríkinu skatta. Þar með þyrfti ekki að hækka launin, en starfið samt orðið meira freistandi í augum þeirra heilbrigðisstarfsmanna sem hafa hrakist frá starfi.

„Hvernig snúum við vörn í sókn? Á göngum spítalans varpaði einn hjúkrunarfræðingur fram hugmynd, sem mér fannst hljóma ansi vel. Hugmynd sem gæti lokkað fólk aftur inn á sjúkrahúsið og þannig aukið getu okkar til að sinna veiku fólki. Fólkinu okkar.

Hugmyndin er þessi: Hvernig væri að veita heilbrigðisstarfsfólki í bráðaþjónustu skattlaust ár? Þannig gæti það orðið mjög eftirsóknarvert að sinna þessum störfum og vandinn við að manna vaktir gæti mögulega minnkað til muna. Þanþol okkar gæti aukist.

Gæti þessi hugmynd gert gæfumuninn?“

Eftir að Ragnar birti þessa hugvekju bentu þó nokkrir honum á að það væri slæm hugmynd að sleppa sumum undan sköttum. Bendir Ragnar þeim á að slíkt hafi oft tíðkast. Til að mynda hafi úrræðið Allir vinna falið í sér endurgreiðslur á virðisaukaskatt, veittur hafi verið afsláttur af rafbílum, sérfræðingar fluttir til landsins hafi fengið skattaafslátt og svona mætti áfram telja.

Ríkið hafi veitt slíkar ívilnanir í ákveðnum tilgangi,  oft til að ná vissum markmiðum og bæta tilteknar stöður. Slíkt eigi vel við núna – Það vanti heilbrigðisstarfsfólk og því þurfi að bregðast við og fjölga í stéttinni.