Karlmaður var í gær dæmdur í 45 daga skilorðsbundið fangelsi í Héraðsdómi Norðurlands eystra fyrir líkamasárás gagnvart unnustu sinni. Árásin átti sér stað á hótelherbergi aðfaranótt sunnugasins 8. mars í fyrra.

Samkvæmt dómnum höfðu þau verið að deila, sem breyttist í smávæginleg líkamleg átök. Síðan á maðurinn að hafa snúið unnustu sína niður í gólfið sem varð til þess að hún rak höfuðið í timburhillu. Í kjölfarið tók hann hana hálstaki og herti að.

Þessi átök urðu til þess að hún hlaut marbletti á vinstri hönd, á upphandlegg og tvo á framhandlegg vinstra megin, marblett á vinstri rasskinn, kúlu á höfði og ummerki á hálsi.

Árásarmaðurinn játaði sök, og ekki þótti nein ástæða til að draga játningu hans í efa. Hann hafði ekki gerst sekur um ofbeldisbrot áður, og var litið til þess við ákvörðun refsingar, en á hinn bóginn var einnig litið til þess að brotið beindist að unnustu mannsins.

Líkt og áður segir hlaut maðurinn 45 daga fangelsisdóm, en fullnustu refsingarinnar verður frestað og fellur hún niður eftir tvö ár ef maðurinn heldur skilorði. Auk þess var hann dæmdur til að greiða 313.312 krónur í sakarkostnað.