„Einkareknir fjölmiðlar verða af átta milljónum á næsta ári vegna aðhaldskröfu ríkisstjórnarinnar. Á sama tíma hækka framlög til Ríkisútvarpsins um 430 milljónir. Þetta er ótrúlega öfugsnúið,“ skrifar Aðalheiður Ámundadóttir, fréttastjóri hjá Fréttablaðinu, í leiðara í blaði dagsins.
Hún bendir á að Blaðamannafélag Íslands hafi lagt til að „þessi öfugsnúningur“ verði leiðréttur þannig að í stað lækkunar framlags til einkarekinna miðla fá þeir átta prósenta hækkun rétt eins og RUV.
„Fátækt íslenskra fjölmiðlafyrirtækja er alvarlegt vandamál fyrir íslenskt samfélag enda ógnar hún þeirri stöðu sem Íslendingar hafa notið svo mjög, að vera meðal upplýstustu þjóða í heimi. Fjársveltir fjölmiðlar eru hvorki í stakk búnir til að hlúa vel að fréttafólki sem hefur ástríðu fyrir starfi sínu né til að veita jafn fullkomna fréttaþjónustu og lýðræðissamfélög krefjast,“ segir Aðalheiður.
Leiðarann má hér lesa í heild sinni en hann ber yfirskriftina Fátæklegt frelsi.
