Undanfarin ár hefur reglulega verið fjallað um vefsíðu þar sem íslenskir strákar dreifa nektarmyndum af íslenskum stelpum. Reynt hefur verið að láta loka vefsíðunni en hún hefur þá komið upp aftur undir breyttu nafni.
Nú virðist þó vera sem þessi hópur stráka sé búinn að færa sig yfir á önnur mið en nýlega var opnaður netþjónn á forritinu Discord þar sem nektarmyndum af íslenskum stúlkum er dreift. Dæmi eru um að strákarnir sem dreifa myndunum á netþjóninum séu undir nafni. Aldur strákanna er ekki á hreinu en ljóst er að einhverjir þeirra eru yngri en 18 ára gamlir.
Orðræðan á Discord netþjóninum svipar til þeirrar sem finna má á vefsíðunni þar sem myndunum var dreift. „Sendið á mig myndir ef þið viljið myndir,“ skrifar til að mynda einn og svo biður annar um nektarmyndir af ákveðinni stelpu. Töluverðu magni af nektarmyndum og myndböndum hefur verið dreift á skömmum tíma á netþjóninum.
Netþjónninn hefur vakið ólgu á samfélagsmiðlinum Twitter eftir að Kristbjörg nokkur deildi færslu þar sem hún varar stelpur við. „Plís passið ykkur á þessum ógeðum,“ skrifar hún og biður fólk svo um að tilkynna um ofbeldið sem fer fram inn á netþjóninum til Discord.
Kolbrún Birna Hallgrímsdóttir Bachmann, laganemi og einn af skipuleggjendum Druslugöngunnar, er ein þeirra sem vekur athygli á ofbeldinu. Hún minnir þá sem taka þátt í ofbeldinu á Discord-netþjóninum að um stafrænt kynferðisofbeldi er að ræða. „Ef þú deilir nektarmynd í leyfisleysi eða skoðar mynd sen aðrir deila í leyfisleysi ertu að taka þátt í stafrænu kynferðisofbeldi,“ segir hún.
Svala nokkur bendir á að það er ekkert grátt svæði þegar kemur að stafrænu kynferðisofbeldi. „Ef þú ert meðlimur í þessari grúppu eða öðrum eins þá ert þú kynferðisofbeldismaður. Það er ekkert grátt svæði. Leitaðu þér hjálpar,“ segir hún.
Helga Ben, meðlimur í Öfgum, vekur einnig athygli á ofbeldinu með færslu á Twitter. Hún merkir lögregluna í færsluna og spyr hvort hún vilji ekki taka á þessu strax í dag. „Þarna eru strákar undir eigin nafni og með mynd af sér, ætti að vera auðvelt verk að vinna. Dreifing hefndarkláms er ólögleg.“
Fleiri taka í sama streng og kalla eftir aðgerðum lögreglu vegna málsins. „300 manns flykkjast inn á íslenska hefndarklámsgrúppu á ca. einum sólarhring Pretty much allt strákar, margir undir eigin nafni – með mynd af sér í prófíl. Nú má fara reyna á nýju hegningarlögin gegn hefndarklámi. Það er ekki erfitt að tracea þessa vitleysinga,“ skrifar til að mynda Birkir nokkur.
DV hafði samband við Bylgju Hrönn Baldursdóttur, lögreglufulltrúi í kynferðisbrotadeild lögreglunnar á höfuðborgarsvæðinu, vegna málsins en hún kannaðist ekki við það sjálf. Hún sagðist ætla að kanna málið.
Aðspurð hvort lögreglan geti látið loka vefsíðum og netþjónum þegar nektarmyndum er dreift á þeim segir Bylgja að það sé erfitt „Það er afskaplega erfitt af því þetta er hýst einhvers staðar annars staðar en hér. Við höfum óskað eftir því að myndir verði teknar af síðunni og það hefur verið gert í sumum tilfellum en alls ekki öllum,“ segir hún.
Bylgja svarar því játandi að baráttan gegn þessu sé erfið. „Þetta er það, þetta er svolítið erfið barátta, það er samt þannig að þegar við höfum óskað eftir því að myndir séu teknar niður þá hefur það verið gert. Það má ekki hafa það af mönnum.“
