Klukkan 15.30 í gær var ekið á rafhlaupahjól á Digranesvegi í Kópavogi. Ökumaður þess var á/við gangbraut þegar þetta átti sér stað. Ökumaðurinn var fluttur á bráðadeild en upplýsingar um meiðsli viðkomandi liggja ekki fyrir.

Á sjöunda tímanum í gær var ekið á gangandi vegfaranda í Hlíðarbergi. Hann var fluttur á bráðadeild. Viðkomandi var ekki með endurskinsmerki og sá ökumaður bifreiðarinnar hann ekki fyrr en hann ók á þann gangandi. Mjög slæm birtuskilyrði og veðuraðstæður voru á vettvangi.

Á Arnarnesvegi lentu tvær bifreiðar í árekstri um klukkan 15 í gær og þurfti að fjarlægja þær báðar með kranabifreið. Einn var fluttur á bráðadeild til skoðunar.

Um klukkan 16.30 varð árekstur á Reykjanesbraut við Kaldárselsveg. Skyndileg bilun í annarri bifreiðinni varð meðal annars til þess að árekstur varð með þeim en ökumaður bifreiðarinnar, sem var ekið á eftir þeirri sem bilaði, náði ekki að stöðva í tæka tíð.

Einn ökumaður var handtekinn í gærkvöldi en hann er grunaður um að hafa verið undir áhrifum fíkniefna.