Leigubílstjórinn David Perry er nú hylltur sem hetja í Bretlandi eftir að hafa læst meintan hryðjuverkamann inni í leigubíl sínum og lifað það af þegar ódæðismaðurinn sprengdi sig í loft upp. Fjölmiðlar ytra birtu í dag myndband af sprengingunni í leigubílnum en lögregla hefur ekki enn gefið út hvort að um hryðjuverk hafi verið að ræða.
Í myndbandinu má sjá leigubílinn koma brunandi upp að Kvennaspítala Liverpoolborgar og nokkrum andartökum síðar springur hann í loft upp. Mikill reykur stígur upp og brak úr bílnum dreifist út um allt. Eftir nokkrar sekúndur má sjá leigubílstjórann, áðurnefndan David Perry, skjögra út úr bílnum og hlaupa frá bílnum og fær hann þegar aðstoð frá manni sem er viðstaddur sprenginguna.
Þann 15. nóvember minnast Bretar lokum fyrri heimstyrjaldarinnar og fallinna hermanna. Sprengingin í leigubílnum átti sér stað nánast á slaginu kl.11 fyrir hádegi en á sama tíma er yfirleitt skipulögð þögn til að minnast hinna látnu. Lögreglan rannsakar nú hvort að tímasetningin hafi verið þaulskipulögð.
Í fréttum ytra hefur komið fram að ódæðismaðurinn hafi stigið upp í leigubíl Perry og beðið hann um að keyra sig að dómkirkjunni í Liverpool, þar sem um 1.200 manns hafi verið viðstaddir messu í tilefni dagsins. Hann hafi svo skipt um skoðun og óskað eftir því að vera keyrður upp að áðurnefndum spítala.
Leigubílstjórinn David Perry hafi veitt því eftirtekt að einhvers konar ljós var á klæðum mannsins sem að hann var sífellt að fikta í. Leigubílstjórinn hafi strax fengið á tilfinninguna að eitthvað óeðlilegt væri á seyði og sá grunur var sannarlega á rökum reistur.
Hann er hylltur sem hetja í Bretlandi því með snörum handtökum virðist hann hafa náð að læsa hryðjuverkamanninn inni bílnum og takmarkað þannig þann skaða sem varð af árásinni. Perry meiddist sjálfur í sprengingunni en meiðsli hans eru þó ekki alvarleg. Hryðjuverkamaðurinn var sá eini sem lést en ekki hefur enn verið borin kennsl á hann.
BBC hefur eftir Joanne Anderson, borgarstjóra Liverpoo: „Leigubílstjórinn ótrúlegt hugrekki. Gjörðir hans komu í veg fyrir hræðilegan harmleik við spítalann.“
Þrír aðrir meintir vitorðsmenn, allir á þrítugsaldri, voru handteknir síðar sama dag í lögregluaðgerð í Kensington-hverfi Liverpool en umfangsmiklar aðgerðir hafa staðið yfir síðan ódæðið átti sér stað.
