Hugmynd Arons Kristins Jónassonar í hugmyndasamkeppninni Hverfið mitt um að reisa styttu af rapparanum Kanye West við Sundlaug Vesturbæjar hefur vakið athygli nokkurra erlendra miðla. Kanye West þarf varla að kynna fyrir neinum en hann er einn vinsælasti tónlistarmaður heims, eiginmaður Kim Kardashian og forsetaframbjóðandi. Því kemur ábyggilega ekki á óvart að erlendir miðlar á borð við Dummy Mag hafi áhuga á framgangi mála.

„Íbúahverfi á Íslandi vill láta byggja styttu af Kanye West á lóð sundlaugarinnar“ segir í frétt Dummy Mag. Stuðst er þar við frétt Reykjavík Grapevine og haft eftir Aroni að styttan myndi laða að þúsundir og jafnvel hundruð þúsunda ferðamanna.

Hugmyndinni var einnig deilt á Reddit-síðu Kanye og hafa nokkrir erlendir einstaklingar komið þaðan og skrifað ummæli inn á Hverfið mitt. Hugmyndin er sú vinsælasta á síðunni en einnig eru margir sem tala gegn henni en augljóst er að fólk er með mjög skiptar skoðanir á styttuhugmyndinni.