Um klukkan eitt í nótt var tilkynnt um mikið vatnsflóð við aðalbyggingu Háskóla Íslands við Sæmundargötu. Aðalkaldavatnsæð hafði rofnað og flæddi vatn inn í nokkrar byggingar HÍ. Slökkvilið er enn á vettvangi að dæla vatni úr byggingunum. Lokað hefur verið fyrir vatnsæðina.

Á sjöunda tímanum í gær var maður handtekinn grunaður um kannabisræktun. Hald var lagt á plöntur og búnað til ræktunar. Manninum var sleppt að skýrslutöku lokinni. Á sjöunda tímanum voru höfð afskipti af manni á heimili í Grafarvogi. Hann var í annarlegu ástandi og var óvelkominn á heimilinu. Hann er grunaður um vörslu fíkniefna og brot á lyfjalögum. Honum var vísað út.

Í Breiðholti var maður stöðvaður þegar hann var á leið út úr verslun með vörur sem hann hafði ekki greitt fyrir. Hann var í tökum öryggisvarða þegar lögreglan kom á vettvang.

Einn ökumaður var handtekinn í gærkvöldi, grunaður um að vera undir áhrifum fíkniefna. Hann reyndist einnig vera sviptur ökuréttindum. Annar ökumaður var kærður fyrir að aka þrátt fyrir að vera sviptur ökuréttindum og var þar um ítrekað brot að ræða.