Lögreglan á Suðurlandi birti fyrr í dag færslu á Facebook-síðu sinni þar sem farið var yfir verkefni síðustu viku hjá lögreglunni. Mest var um að ræða umferðalagabrot en voru gripnir við að keyra gífurlega hratt. „11 ökumenn voru í liðinni viku kærðir fyrir að aka of hratt í umdæmi lögreglunnar á Suðurlandi. 4 þeirra voru á 120 til 129 km/klst hraða og 1 á 137 km/klst hraða, allir á 90 km/klst vegi,“ segir í færslunni.
Þá lagði lögreglan hald á um 30 kannabisplöntur í einbýlishúsi í Árnessýslu þann 14. janúar síðastliðinn. „Íbúi hússins kannaðist við að eiga ræktunina sem hafði verið komið fyrir í sérstaklega innréttuðu herbergi í kjallara hússins,“ segir í færslunni.
Lögreglan segir síðan frá því að loka hafi þurft líkamsræktarstöð í umdæminu vegna mögulegra brota á sóttvarnarreglum. „Niðurstaðan var að að líkindum brotið hefði verið gegn sóttvarnarreglum og ákvað umsjónarmaður viðkomandi stöðvar að loka henni þar til hlutirnir yrðu komnir í lag. Skýrsla rituð um málið og fer sína leið til ákærusviðs.“
Eitt mál í tilkynningunni var þó afar óvenjulegt en það vakti meðal annars athygli Vísis sem greindi frá málinu. Einstaklingur nokkur hringdi nefnilega virkilega oft á neyðarlínuna án þess að neitt væri af. „Einstaklingur sem hringt hafði á neyðarlínu um 130 sinnum frá morgni laugardags til hádegis, án þess að tilefni væri til fyrir samtalinu, var handtekinn á dvalarstað sínum á hosteli á Selfossi,“ segir í færslu lögreglu.
„Yfirheyrður um málið en sleppt að yfirheyrslu lokinni. Hann brást ókvæða við afskiptunum og hrækti á lögreglumenn sem höfðu afskipti af honum.“