„Í kjölfar frétta um gæsluvarðahald ungs manns vill Afstaða koma eftirfarandi á framfæri: Ofbeldi innan framhaldsskóla á aldrei að líðast, frekar en annars staðar í samfélaginu. Engu að síður er hér að ræða um ungt fólk og hefur Afstaða af því áhyggjur að það sé sett í gæsluvarðhald og einangrun.“
Svona hefst fréttatilkynning sem Guðmundur Ingi Þóroddsson, formaður Afstöðu, félags fanga á Íslandi, sendi á fjölmiðla í dag. Tilkynningin er send í kjölfar þess að ungur maður er nú einangrun vegna rannsóknar á árásinni í Borgarholtsskóla.
Í tilkynningunni segist Guðmundur hafa áhyggjur af því að fólk sé sett í einangrun, ekki síst þegar um er að ræða ungt fólk. „Lögregla hefur lítið gefið út annað en að hún hafi sett fram kröfu um að þrjú ungmenni ættu að sæta einangrun á grundvelli rannsóknarhagsmuna. Það þýðir að lögregla óttast að umrædd ungmenni muni torvelda rannsókn málsins. Héraðsdómur Reykjavíkur hafnaði tveimur kröfum en úrskurðaði pilt í einangrun í viku,“ segir hann.
„Fyrir þá sem ekki vita þýðir það að umræddur piltur sér ekki dagsljós nema í klukkustund á hverjum degi en bíður annars örlaga sinna í þröngum klefa hina 23 klukkutímana á sólarhring.
Oft hefur Afstaða fjallað um neikvæðar afleiðingar þess að einangrun hefur á andlegt líf þeirra sem þurfa að þola en eðlilega eru þær enn verri þegar um er að ræða ungt og óharðnað fólk.“
Guðmundur segir að Afstaða sjái ekki að það þjóni hagsmunum rannsóknarinnar á málinu að einn af þessum þremur piltum sitji nú í einangrun. Þá fer Afstaða einnig fram á það við lögreglu að rannsókn málsins sé hraðað þannig að „hægt sé að afstýra frekari neikvæðum áhrifum einangrunarinnar á umrætt ungmenni“.