Í Hólagarði fóru fram hópslagsmál í dag en sjónarvottar segja tvo menn hafa verið að slást en einnig að þeir hafi ógnað ungmennum sem voru á svæðinu. Fréttablaðið greindi frá málinu og ræddi við vitni að slagsmálunum.
„Við heyrðum börn gráta og sáum tvo menn takast á, annar þeirra virtist vera reyna að slást við börnin sem voru mjög skelkuð,“ sagði starfsmaður Afrozone í samtali við Fréttablaðið um málið.
Fréttablaðið ræddi við annað vitni sem mætti á vettvang eftir að slagsmálin voru búin. Sá sagði að lögreglan hafi mætt þegar átökunum var lokið. Þá sagði sama vitnið að lögreglan hafi tekið skýrslu af fólki á svæðinu.
„Lögreglan var að ræða við ungan pilt sem hafði greinilega verið að reyna að stöðva átökin,“ segir vitnið og tekur fram að pilturinn hafi verið með sár sem blæddi úr á höndunum.
Rætt var við lögregluna en lítið var um upplýsingagjöf frá þeim að sögn Fréttablaðsins. Lögreglan vildi til að mynda ekki staðfesta hvort að um hópslagsmál hafi verið að ræða.