Þórdís Valsdóttir, lögfræðingur og fjölmiðlakona, greinir frá nauðgun sem hún varð fyrir er hún var 19 ára, í grein sem birtist á Vísir.is í dag.
Þórdís treysti sér ekki til að kæra þegar henni var gert ljóst hver eru örlög meirihluta kærðra kynferðisbrota í réttarkerfi. Í greininni segir:
„Ég var 19 ára og ég kærði ekki.
Ég gerði allt „samkvæmt bókinni”, í upphafi í það minnsta. Leitaði beint til Neyðarmóttöku LSH í Fossvogi og var skoðuð af lækni og gaf skýrslu.
Svo var mér greint frá því hvernig svona mál fara í réttarkerfinu. Um 70% nauðgunarmála komast aldrei í dómsal. Sönnun í slíkum málum er erfið – orð gegn orði, þið vitið. Opinberunin líka erfið. Ég treysti mér ekki í þann slag og reyndi mitt besta að sópa öllu undir teppið.“
Þórdís segir að maðurinn sem braut gegn henni hafi verið saklaus fyrir dómi en hún viti að hann hafi hvergi nærri verið saklaus. Hún segir umræðu undanfarna mánuði hafa verið erfiða fyrir þolendur ofbeldis því þeim sé ekki trúað. Þá segir:
„Er fjarstæðukennt að trúa þeim örfáu þolendum sem greina opinberlega frá þeim brotum sem þær hafa orðið fyrir? Það hljóta allir að sjá að enginn leikur sér að því að opinbera sig með slíkum hætti.
Ætlum við virkilega að samþykkja það að háttvirtir karlmenn innan samfélagsins, innan réttarkerfisins, brýni raustina og smáni opinberlega konur sem segja frá, til þess eins að rýra trúverðugleika þeirra?“
Þórdís bendir á að útbreitt kynferðisofbeldi snúst um rótgróin viðhorf viðhorfi í samfélaginu og menningu okkar.
