Aðgerðastjórn Almannavarna á Austurlandi hefur sent frá sér tilkynningu þar sem greint er frá því að farþegi sem greindist með Covid-smit um borð í skemmtiferðaskipi sem lagðist að höfn á Djúpavogi hafi verið settur í einangun. Maki hins smitaða fór í sóttkví í annarri káetu.

Á Djúpavogi fóru farþegar skipsins í land án fullnægjandi leyfis sem tilskilið var með vísan í framangreindar aðstæður um borð. Lögreglan skoðar nú hugsanlegt brot á reglum og fer með rannsókn málsins. Í tilkynningunni segir enn fremur:

„Það er mat aðgerðastjórnar að hætta á dreifingu smits af þessum sökum sé lítil. Hún hvetur engu að síður verslunareigendur og þjónustuaðila sem fengu til sín gesti frá skipinu, að gæta vel að sprittun og þrifum auk þess að nota tækifærið til að hvetja til áframhaldandi persónubundinna sóttvarna þrátt fyrir rýmri reglur innanlands.“