Maður sem skemmti sér á bæjarhátíðinni Kótelettunni sem fram fór á Selfossi um helgina fór í öndunarstopp. Aðfaranótt sunnudags hafði einstaklingurinn verið yfirbugaður af dyravörðum á hátíðarsvæðinu vegna ölvunar og óspekta. Þetta kemur fram í tilkynningu frá lögreglu.

Hann var handtekinn í kjölfarið og færður í fangageymslu, þar kastaði hann upp og fór í framhaldinu fór hann í öndunarstopp. Endurlífgunaraðgerðir hófust af lögreglumönnum og hjúkrunarfræðingi og komst hann fljótlega til meðvitundar.

Maðurinn var fluttur á sjúkrahús í Reykjavík en er nú útskrifaður þaðan, heill heilsu.

Atvik þetta verður tilkynnt til Nefndar um eftirlit með störfum lögreglu. Í tilkynningunni segir að það sé vegna þess hve alvarlegt það er. Sá sem ritar tilkynninguna tekur fram að hann haldi að lögreglumenn og hjúkrunarfræðingur hafi bjargað lífi mannsins:

„Það er mat þess er þetta ritar að lögreglumenn og nærstaddur hjúkrunarfræðingur hafi, með árvekni sinni og skjótum og fumlausum viðbrögðum, bjargað lífi mannsins.“

Einnig kemur fram að fjórar líkamsárásir hafi verið tilkynntar til lögreglu um helgina.